हेटौंडा — मकवानपुर जिल्लास्तरीय भलिबल प्रतियोगिताको उपाधि थाहा नगरपालिका–२ को मंगलेश्वर युवा क्लबले हात पारेको छ ।

खेलकुद कृषि तथा पर्यटन महोत्सव स्थलमा मंगलबार सम्पन्न फाइनल खेलमा हेटौंडा उपमहानगरपालिका–११  स्थित छहारी युवा समाजलाई ३–० को सोझो सेटले हराउँदै मंगलेश्वर युवा क्लबले उपाधि जितेको हो । प्रतियोगिताको आयोजना जिल्ला खेलकुद समितिले गरेको हो । 

छहारी युवा समाजलाई मंगलेश्वरले २७–२५, २५–२० र २५–१६ को सेटले पराजित गरेको हो । उपाधि जितेसँगै मंगलेश्वर युवा क्लबको टिमले १ लाख रुपैयाँसहित शिल्ड, मेडल तथा प्रमाणपत्र प्राप्त गरेको छ ।

उपविजेता छहारी युवा समाजको टिमले ५० हजार रुपैयाँ र शिल्ड, मेडलमा चित्त बुझाउनुपरेको छ । सेमिफाइनलमा पुगेका २ टिम प्रतिभा साँस्कृति युवा क्लब बज्रबाराही र मनहरीको टिमले १५/१५ हजार रुपैयाँसहित मेडल प्राप्त गरेका छन् । मकवानपुर जिल्ला भलिबल संघको व्यवस्थापनमा भएको प्रतियोगितामा ८ वटा टिमको सहभागिता थियो ।