सन्तोषी श्रेष्ठ र निर्मला केसी पिंक केयराथनमा विजेता बनेका छन् । ओलम्पियन सन्तोषीले २१.१ किलोमिटर हाफ म्याराथन र निर्मलाले १० किलोमिटर दौड जितेकी हुन् ।
काठमाडौँ — सन्तोषी श्रेष्ठ र निर्मला केसी पिंक केयराथनमा विजेता बनेका छन् । ओलम्पियन सन्तोषीले २१.१ किलोमिटर हाफ म्याराथन र निर्मलाले १० किलोमिटर दौड जितेकी हुन् ।
जावलाखेल फुटबल मैदानमा शनिबार भएको प्रतियोगितामा सन्तोषीले प्रतिद्वन्द्वीलाई कुनै मौका दिइनन् भने निर्मलाले साँघुरो अन्तरमा सफलता हात पारिन् । धादिङकी धाविका सन्तोषीले १ घन्टा २१ मिनेट ११ सेकेन्डमा दौड पूरा गरिन् । जावलाखेलबाट सुरु भएको दौड पुल्चोक हरिहरभवन, बखुन्डोल, झम्सिखेल, धोवीघाट, बल्खु, कलंकी पुगेर एकान्तकुनमा हुँदै पुनः जावलाखेल मैदानमा आएर टुंगिएको थियो । सन्तोषीले जुम्लाकी राज्यलक्ष्मी रावललाई ७ मिनेटभन्दा बढी समयले पछाडि पारिन् ।
राज्यलक्ष्मीले १ घन्टा २८ मिनेट १ सेकेन्डबाट दोस्रो र त्रिभुवन आर्मी क्लबकी सरस्वती भट्टराई १ घन्टा २९ मिनेट ५९ सेकेन्डबाट तेस्रो भए । एपीएफ क्लबकी सुशीला महत १ घन्टा ३१ मिनेट ०२ सेकेन्डबाट चौथो र गोरखाकी गीता नेपाली १ घन्टा ५१ मिनेट ५४ सेकेन्डबाट पाँचौं भए ।
महिला सशक्तीकरण तथा स्तन क्यान्सरसम्बन्धी सचेतना अभिवृद्धि गर्ने उद्देश्यले लेजरपोर्ट नेपालद्वारा आयोजित पिंक केयराथनको हाफ म्याराथनका शीर्ष तीन विजेताले क्रमशः ५१ हजार, ३१ हजार र २१ हजार रुपैयाँ पुरस्कार पाए । १० किमि दौडतर्फ आर्मीकी निर्मलाबाहेक एपीएफकी आशा राउत दोस्रो र पुलिसकी सुमित्रा चौधरी तेस्रो भए ।
निर्मलाले ४० मिनेट ०८ सेकेन्ड, आशाले ४० मिनेट २७ सेकेन्ड र सुमित्राले ४१ मिनेट ५० सेकेन्डमा दौड पूरा गरेका थिए । वर्षा थुमा ५४ मिनेट ४६ सेकेन्डका साथ चौथो, इन्द्रमाया पाख्रिन ५७ मिनेट २४ सेकेन्डका साथ पाँचौं र शितु लामा ५८.५६ सेकेन्डका साथ छैटौं भए । १० किलोमिटरका शीर्ष तीन विजेतालाई क्रमशः ३१, २१ र ११ हजार रुपैयाँ प्रदान गरिएको थियो ।
त्यस्तै फन रनको रूपमा रहेको ५ किलोमिटरमा तिलुमाया सुनुवार, रेश्माकुमारी रावल, सीता रिमाल तथा ३ किलोमिटरमा सुप्रिता थापा, गायत्री श्रेष्ठ र सांग्रिला श्रेष्ठ क्रमशः पहिलो, दोस्रो र तेस्रो भए । फन रनतर्फ उत्कृष्ट १०–१० जनालाई आकर्षक उपहार प्रदान गरिएको थियो ।
लेजरपोर्टका अध्यक्ष नमराज जोशीका अनुसार झन्डै १ हजार ५ सयको सहभागिता थियो । उनीहरूलाई दौडअघि जुम्बा गराइएको थियो । कार्यक्रममा मुम्बईबाट आएका गायक जनिष्ट जोशीले सांगीतिक प्रस्तुति दिए । सन् २०१७ देखि काठमाडौं पिंकाथनको नामबाट दौड सुरु गरेको प्रतियोगिताको यो छैटौं संस्करण हो । २०१९ सम्ममा गरी लगातार तीन पटक आयोजना भएको यो प्रतियोगिता कोभिडपछि रोकिएको थियो । त्यसयता लगातार आयोजना भइरहेको छ ।
