काठमाडौँ — काठमाडौं पिंक केयरएथन फागुन ३० गते हुने भएको छ । महिलाको स्वास्थ्य, फिटनेस र आत्म–सचेतनामा अभिवृद्धि गर्ने उद्देश्यले लेजर पोर्ट नेपालले सन् २०१७ देखि काठमाडौं पिंकाथनको नामबाट सुरु गरेको दौड प्रतियोगिताको यो छैटौं संस्करण हो ।  

लगातार तीन पटक आयोजना भएको यो प्रतियोगिता कोभिडपछि भने रोकिएको थियो । २०२४ र २०२५ पुनः प्रतियोगिता आयोजना भयो । जावलाखेल युथ क्लबको मैदानबाट सुरु हुने पिंक केयरएथनमा झन्डै ३ हजार सहभागी हुने लेजर पोर्टका प्रमुख नमराज जोशीको विश्वास छ ।   

व्यावसायिकतर्फ २१ किलोमिटर (हाफ म्याराथन) र १० किलोमिटरमा दौड हुनेछ । हाफ म्याराथनको शीर्ष तीन स्थानमा रहनेले ५१, ३१ र २१ हजार तथा १० किमितर्फ शीर्ष तीनका विजेताले क्रमशः ३१, २१ र ११ हजार रुपैयाँ पुरस्कार पाउने छन् । ३ र ५ किमि दौडमा टपटेनलाई विशेष पुरस्कार दिने र यसमा गैरव्यावसायीक खेलाडीले मात्र खेल्न पाउने जोशीले बताए । 

महिलालाई स्वस्थ जीवनशैलीतर्फ प्रेरित गर्ने लक्ष्यसहित आयोजना गरिने पिंक केयरएथनमा यसपालि कीर्तिमानी सहभागिता रहने आशा प्रमुख जोशीको छ । ‘महिलाले घर परिवारबाहेक आफ्नो स्वास्थ्यप्रति पनि ध्यान दिनुपर्ने हुन्छ, त्यसैले उनीहरूको सचेतनाका लागि पिंक केयरएथन गर्दै आएका छौं,’ जोशीले भने, ‘हरेक वर्ष आयोजनाका क्रममा चुनौतीहरू थपिएका छन् । तर यसले दिने सन्देश ठूलो छ, त्यसैले हामीले यसलाई निरन्तरता दिँदै आएका छौं ।’