पाल्पा — राष्ट्रिय महिला भलिबल टोलीकी स्पाइकर उषा भण्डारीलाई पाल्पाको रामपुरमा सम्मान गरिएको छ ।

रामपुर नगरपालिका र नगर खेलकुद विकास समितिले उषालाई सम्मान गरेको हो । उनलाई रामपुर नगरपालिकाका नगर प्रमुख रमणबहादुर थापा, उपप्रमुख बालकुमारी थापा, नगर खेलकुद विकास समितका अध्यक्ष कमल सेनलगायतले सम्मान प्रदान गरे ।

उषाले छिमेकी जिल्ला तनहुँमा जन्मिए पनि आफ्नो पाल्पासँग पारिवारिक सम्बन्ध भएको बताइन् । ‘यो सम्मानप्रति आभारी छु,’ उनले भनिन्, ‘खेलाडीको रूपमा सम्मानित हुन पाउँदा अझ धेरै खुसी लागेको छ ।’ उनले रामपुरको मैदानमा आएर खेल्न इच्छुक रहेको बताइन् ।

तनहुँ भिमाद–१ की उषाले भलिबल खेल्न थालेको १२ वर्षको उमेरदेखि नै हो । २०७४ सालमा नेपाल पुलिस स्कुलमा भर्ना भएपछि भलिबल यात्राले औपचारिक गति लिएको थियो । पुलिस स्कुलमा पुगेको ६ महिनापछि उनले नेपाल पुलिस क्लबमा प्रशिक्षणको अवसर पाएकी थिए । उषा अलराउन्डर पोजिसनबाट खेल्थिन् । पुलिसमा अनुभवी खेलाडीसँग खेल्दा आफूले धेरै सिक्ने अवसर पाएको अनुभव सुनाइन् । जसलाई उनले भरपुर सदुपयोग गर्दै आफ्नो प्रदर्शन सुधार गरेकी थिइन् ।