सुनसरी — नमुना र विश्वआदर्श कलेजले इटहरीमा जारी नमुना सुपर कप अन्तरकलेजस्तरीय ट्वान्टी–ट्वान्टी क्रिकेट प्रतियोगितामा विजयी सुरुवात गरेका छन् । 

इटहरीस्थित जनता पार्क क्रिकेट मैदानमा बिहीबार भएको उद्धघाटन खेलमा आयोजकको टिम नमुना कलेजले कोसी सेन्टजेम्स कलेजलाई ९ विकेटले पराजित गर्दै सेमिफाइनल प्रवेश गरेको हो । टस जितेर पहिले ब्याटिङ गरेको कोसी निर्धारित २० ओभरको खेलमा सबै विकेट गुमाएर ६१ रनमा समेटिएको थियो । 

६२ रनको विजयी लक्ष्य पाएको नमुनाले ५ दशमलव २ बलमा केवल १ विकेट गुमाउँदै लक्ष्य पूरा गरेको थियो । खेलको प्लेयर अफ द म्याच नमुनाका सुबित मेहता घोषित भए । ३ ओभर बलिङ गरेका उनले १० रन खर्चिएर ३ विकेट हात पारेका थिए । सोक्रममा उनले १ मेडन ओभर बलिङ गरे । 

बिहीबार नै सम्पन्न दोस्रो खेलमा इटहरीको विश्वआदर्श कलेजले सुस्मा गोदावरी कलेजमाथि १० विकेटको फराकिलो जित निकालेको छ । टस जितेर ब्याटिङ गरेको सुस्माले प्रस्तुत गरेको २७ रनको झिनो लक्ष्य विश्वआदर्शले १ दशमलव १ बलमै सहजै भेटायो । उक्त खेलमा विश्वआदर्शका भुपाल लुइँटेल म्यान अफ द म्याच घोषित भए । ४ ओभर बलिङ गर्दा १ मेडनसहित ६ विकेट हात पारेका उनले केवल ५ रन मात्र खर्चिए ।