सुनसरी — तीन पटकको च्याम्पियन न्युरोड टिम एनआरटी २६ औं संस्करणको अन्तराष्ट्रिय आमन्त्रण बुढासुब्बा गोल्डकपको क्वाटरफाइनलबाटै बाहिरिएको छ ।

शनिबार भएको पहिलो क्वाटरफाइनलमा यसै वर्ष ए डिभिजनमा उक्लिएको काठमाडौंको प्लानिङ ब्वाइज युनाइटेडसँग २–० ले पराजित हुँदै एनआरटी बुढासुब्बा गोल्डकपको क्वाटरफाइनलबाटै बाहिरिएको हो ।

धरान रंगशालामा भएको खेलमा प्लानिङ ब्वाइजका लागि बिदेसी खेलाडी केबे र श्याम मुर्मुले गोल गरे । केबेले खेलको ४३ र मुर्मुले ८६ औं मिनेटमा गोल गरेका थिए । खेलको म्यान अफ द म्याच प्लानिङ ब्वाइजका गोलकिपर योगेस धिमाल घोषित हुँदै नगद १० हजार पाए ।

प्लानिङ ब्वाइजले अब आगामी बुधबार हुने पहिलो सेमिफाइनलमा आयोजक धरान फुटबल क्लब र पोखराको लालीगुराँस एफसीबीचको बिजेतासँग प्रतिष्पर्धा गर्नेछ । आयोजक धरानले उद्घाटन खेलमा पाहुना टोली जर्जियन फुटबल क्लब भारतलाई पराजित गर्दै क्वाटरफाइनल प्रवेश गर्दा लालिगुराँसले सिधै वाई पाएर अन्तिम आठको यात्रा तय गरेको थियो ।