सुनसरी — नमुना कलेज र स्मल हेभन स्कुल इटहरीमा जारी हिसान कप क्रिकेट प्रतियोगिताको फाइनलमा पुगेका छन् ।

उच्च शिक्षालय तथा माध्यमिक विद्यालय संघ (हिसान) सुनसरीको आयोजनामा भैरहेको प्रतियोगिताको बुधबार सम्पन्न पहिलो सेमिफाइनलमा इटहरीको नमुनाले सुष्मा गोदावरी कलेजलाई ४९ रनले पराजित गर्दै उपाधिनजिक पुगेको हो । 

जनता क्रिकेट मैदानमा टस जितेर पहिले ब्याटिङ गरेको नमुनाले निर्धारित १० ओभरको खेलमा ३ विकेट गुमाउँदै १ सय ८ रन बनाएको थियो । नमुनाका लागि राजु विकले अर्धशतकीय इनिङ खेले । उनले २५ बलमा ५८ रन बनाएर अविजित रहे । गुञ्जन दाहालले ११ रन जोडे । जवाफमा १ सय ९ रनको विजयी लक्ष्य पछ्याएको सुष्मा गोदावरीले ६ विकेट गुमाउदै ५९ रन मात्र बनाउन सक्यो । उसका लागि अनिल बस्नेतले नटआउट २६ रन बनाउँदा एमडी आदिलले १६ रन जोडे । नमुनाका राजु विक प्लेयर अफ द म्याच घोषित भए । 

बुधबार नै सम्पन्न दोस्रो सेमिफाइनलमा इनरुवाको स्मल हेभन स्कुलले इटहरीको कोसी सेन्टजेम्सलाई १ सय ४ रनको फराकिलो अन्तरले पराजित गर्दै नमुनासँगको उपाधि भिडन्त पक्का गरेको छ । स्मल हेभनले प्रस्तुत गरेको १ सय ६३ रनको विजयी लक्ष्य पछ्याएको कोसी सेन्टजेम्स १० ओभरमा सबै विकेट गुमाएर ५८ रनमा समेटियो । कोसी सेन्टजेम्सका मोहित विश्वकर्माले २२ रन बनाउनुबाहेक अन्य ब्याटरले दोहोरो अंकमा रन जोड्न सकेनन् ।