काठमाडौँ — चितवनको फिस्लिङमा सम्पन्न नवौं राष्ट्रिय र्‍याफ्टिङ तथा १४ औं राष्ट्रिय क्यानोइङ प्रतियोगितामा नेपाल र्‍याफ्टिङ एन्ड कायक क्लब फिस्लिङ ‘ए’ ले उपाधि जितेको छ ।

मंगलबार प्रतिस्पर्धाको अन्तिम दिन र्‍याफ्टिङका तीनवटै मुख्य विधामा उत्कृष्ट प्रदर्शन गर्दै फिस्लिङ ‘ए’ ले कुल ९७२ अंक जोडेर ट्रफी जितेको हो । सहभागी कुल १२ क्लबलाई पछि पार्ने क्रममा फिस्लिङ ‘ए’ ले स्लालममा ३००, हेड–टु–हेडमा ३५० र डाउन रिभर रेसमा ३२२ अंक प्राप्त गर्‍यो । प्रतियोगितामा ८९९ अकसहित प्याडल नेपाल ‘बी’ दोस्रो र ८५१.५ अंकसहित र्‍याफ्टिङ एड्भेन्चर नेपाल तेस्रो भए । त्यस्तै, भोटेकोसी एड्भेन्चर क्लबका ‘ए’ र ‘सी’ टोली क्रमशः चौथो र पाँचौं स्थानमा सीमित रहे ।

प्रतियोगिताको कायक स्लालोम विधामा विजय माझी च्याम्पियन बनेका छन् । उनले निर्धारित दूरी १२४.५१ स्कोरसहित पूरा गर्दै शीर्षस्थान हासिल गरे । सोही विधामा आशिष रानामगर १२६.९२ स्कोरसहित दोस्रो स्थानमा रहे । रन्जन कँडेल, रवीन्द्र चेपाङ र रुबिन तामाङले क्रमशः तेस्रो, चौथो र पाँचौं स्थान सुरक्षित गरे । र्‍याफ्टिङ विजेता टोलीले ६५ हजार, दोस्रोले ३५ हजार र तेस्रोले २५ हजार रुपैयाँ प्राप्त गरे । कायक स्लालोमतर्फ पहिलो, दोस्रो र तेस्रो हुनेले क्रमशः २५ हजार, १५ हजार र ७ हजार ५ सय रुपैयाँ हात पारे ।