डोल्पा — पहाड र हिमाली जिल्लामा प्रायः भलिबल लोकप्रिय खेल हो । तर, जिल्लाको ठूलीभेरी नगरपालिका–५ मा जन्मिएका विमल रोकायको तेक्वान्दो खेलप्रति विशेष लगाव छ । २९ वर्षीय उनी तेक्वान्दोका राष्ट्रिय खेलाडी र प्रशिक्षक हुन् ।

तेक्वान्दोप्रतिको रुचिले कलिलै उमेरमा दुई दर्जनभन्दा धेरै अन्तरदेशीय प्रतियोगितामा सहभागी भएर स्वर्ण, कास्य तथा रजत पदक जितिसकेका छन् । दुर्गममा हुर्किएर पनि उनले ललितपुरको हात्तीवनमा खेलकुद एकेडेमी सञ्चालन गरेका छन् । उनका दाइ सुवर्ण बक्सिङ खेलाडी हुन् । दाइकै प्रेरणाले खेलकुद क्षेत्रमा लागेको उनले बताए । स्कुलबाटै काराँतेको प्रशिक्षण लिएका उनको खेलाडी बन्ने प्रण थियो । त्यसैले उच्च शिक्षा अध्ययनका लागि काठमाडौं पुगेपछि पढाइसँगै तेक्वान्दो सिक्न थाले । 

‘काठमाडौं आएपछि त्रिपुरेश्वरस्थित दशरथ रंगशाला डोजाङमा तेक्वान्दो सिक्न सुरु गरेको हुँ,’ रोकायले भने, ‘थप प्रशिक्षण ललितपुरमा पनि लिएँ । सानै उमेरमा दुई दर्जन राष्ट्रिय तथा अन्तर्राष्ट्रिय खेलमा भाग लिने अवसर पाएँ ।’ भारत, थाइल्यान्ड, बंगलादेश, हङकङ, जापान, मलेसिया लगायतका मुलुकमा उत्कृष्ट प्रदर्शन गरेर स्वर्ण, कास्य, रजत पदक जितिसकेको उनले बताए ।

सन् २०१५ मा ललितपुरमा भएको मार्सल आर्ट्स प्रतियोगितामा उत्कृष्ट भएर स्वर्ण पदक जितेका थिए । सन् २०१९ मा थाइल्यान्डमा भएको पाँचौं हिरोज इन्टरनेसनल तेक्वान्दो प्रतियोगितामा कास्य पदक र सन् २०२३ मा हङकङमा भएको २७ औं एसियन सिटिज तेक्वान्दो प्रतियोगितामा रजत पदक जितेको उनले बताए ।