धनगढी — ‘सिटी अफ क्रिकेट’ को परिचय बनाउँदै आएको कैलालीको धनगढी उपमहानगरपालिकामा निजी क्षेत्रको लगानीमा अन्तर्राष्ट्रिय मापदण्डको क्रिकेट मैदान धनगढी ओभल निर्माणको काम अन्तिम चरणमा पुगेको छ ।

क्रिकेट अभियन्ता सुवास शाही र मोहन साउँदको लगानीमा धनगढी उपमहानगरपालिका–३, बोराडाँडीमा करिब ५ बिघा क्षेत्रफलमा निर्माणाधीन मैदानको काम अन्तिम चरणमा पुगेको हो । मैदान निर्माणको काम आठ महिनाअघि सुरु गरिएको हो । हालसम्म भरान गरेर मैदान सम्याउने, तथा चारैतिर तारजाली लगाउने काम सम्पन्न भइसकेको छ । 

मैदानको सिँचाइका लागि ३६० डिग्री ड्रेनेज प्रणाली तयार पारिएको छ । सोमबारदेखि पिच निर्माणको काम पनि सुरु गरिएको छ । ‘पहिलो चरणमा चार वटा पिच निर्माण सुरु गरेका छौं,’ पिचको शिलान्यास गर्दै लगानीकर्ता शाहीले भने, ‘आगामी वैशाखसम्ममा पहिलो चरणको सबै काम सम्पन्न गरी मैदानलाई ट्रायल फेजमा ल्याउने लक्ष्य छ ।’ धनगढीको रिङरोडसँग जोडिएको धनगढी ओभललाई तीन चरणमा निर्माण गर्ने योजना रहेको उनी जनाउँछन् । 

पहिलो चरण पूरा भएलगत्तै मैदान सञ्चालनमा आउनेछ । दोस्रो चरणमा खेलाडी चेन्जिङ रुम, पेभिलियन, डगआउट र अभ्यासका लागि नेटहरू निर्माण गरिनेछ । तेस्रो चरणमा प्यारापिट, फ्लडलाइट तथा कफी सप निर्माण गर्ने योजना रहेको शाहीले बताए । पश्चिमतर्फ बाह्रमासे पानी बग्ने मोहना नदी रहेकाले त्यहाँ रिभर साइड विकास गर्ने अवधारणासमेत अघि सारिएको धनगढी क्रिकेट एकेडेमीका अध्यक्ष पनि रहेका शाहीले बताए । पहिलो चरणमा करिब १ करोड रुपैयाँ खर्च भइसकेको र तीनै चरण सम्पन्न हुँदा १५ करोड रुपैयाँभन्दा बढी लगानी लाग्ने अनुमान शाहीको छ ।

मैदान निर्माणको सम्पूर्ण प्राविधिक पक्ष अन्तर्राष्ट्रिय पिच क्युरेटर माधव पाठकले हेरिरहेका छन् । क्युरेटर पाठकका अनुसार मैदानको बाउन्ड्री साइज ६५ देखि ७५ मिटरभन्दा बढी छ । ‘माटो परीक्षण, मैदानको स्लोप तथा पिच निर्माण सबै अन्तर्राष्ट्रिय मापदण्डअनुसार गरिएको छ,’ पाठकले भने, ‘यस कारण यहाँ राष्ट्रिय तथा अन्तर्राष्ट्रियस्तरका प्रतियोगिता सञ्चालन गर्न सकिन्छ ।’