महोत्तरी — भुवन नगरकोटीले सूर्य नेपाल एनपीजीए टुर च्याम्पियनसिपमा दोस्रो दिन सकिँदा उपाधि जित्ने सम्भावना बलियो बनाएका छन् ।

उनले टंकबहादुर कार्की र भुवनकुमार रोक्कालाई ६ स्ट्रोकले पछि पारेका छन् । टंक र भुवनले समग्रमा १ अन्डर १४३ स्कोर बनाए । दोस्रो राउन्डमा टंकले १ अन्डर ७१ र भुवन रोक्काले २ ओभर ७४ स्कोर गरेका थिए ।

सुमन परियार २ अन्डर ७० सहित इभन पार १४४ स्कोर बनाएर चौथो स्थानमा छन् । कुल १ ओभर १४५ सहित नेपालका नम्बर एक प्रो नीरज तामाङ (७२), सुमन राई (७४) र धनबहादुर थापा (७४) संयुक्त पाँचौं स्थानमा छन् । सञ्जय लामा १ अन्डर ७१ खेल्दै कुल २ ओभर १४६ सहित आठौं स्थानमा पुगेका छन् ।

जयराम श्रेष्ठ र दिनेश प्रजापतिले ३ ओभर १४७ सहित संयुक्त नवौं स्थान ओगटे । जयरामले दिनकै उत्कृष्ट ३ अन्डर ६९ कार्ड बनाए भने दिनेशले २ ओभर ७४ खेले । 

८ ओभर १५२ को स्कोरमा कट लागू भउको छ । त्यसमा १८ प्रो र दुई एमेच्योर अन्तिम राउन्डमा पुगेका छन् । प्रोतर्फ कुमार कामी, रवि खड्का, रमेश अधिकारी, प्रदीपकुमार लामा, सूर्यप्रसाद शर्मा, बलभद्र राई, सविन सापकोटा र दीपक मगरले कट बनाएका छन् ।

एमेच्योरतर्फ प्रकृत तामाङ ३ ओभर १४७ स्कोरसहित शीर्षस्थानमा छन् । उनी समग्रमा संयुक्त नवौं स्थानमा छन् । प्रकृत ५ ओभर १४९ स्कोरसहित दोस्रो स्थानमा रहेका सुन्दर राईभन्दा दुई स्ट्रोकको अगाडि छन् । सुन्दरले दोस्रो राउन्डमा २ ओभर ७४ खेलेका थिए ।