काठमाडौँ — नेपाल स्पोर्ट्स समिट कमिटीले नेपाल स्पोर्ट्स समिट गर्ने घोषणा गरेको छ ।

स्पोर्ट्स समिट माघ २२ (फेब्रुअरी ५) मा होटल सोल्टीमा आयोजना गरिने आयोजक कमिटीले जनाएको छ । समिटमा नेपालको खेल क्षेत्रसँग सम्बन्धित नीति, पूर्वाधार, सञ्चार, डिजिटल सामग्री र अन्तर्राष्ट्रिय सहकार्यका विषयहरूमा केन्द्रित पाँच उच्चस्तरीय प्यानलमा छलफल सत्र सञ्चालन गरिने जनाइएको छ ।

सत्रहरूमा खेल कूटनीति, खेल पूर्वाधार विकास, उदीयमान खेलहरूको विकास, खेल सञ्चार तथा प्रसारणको भूमिका र डिजिटल खेल सामग्री तथा इन्फ्लुएन्सरमार्फत खेल कथनवाचन जस्ता विषयहरू समेटिने आयोजकमध्येका एक भाष्कर राजकर्णिकारले बताए ।

स्पोर्ट्स समिटको मुख्य उद्देश्य नेपाललाई विश्वस्तरीय खेल पर्यटन गन्तव्यका रूपमा स्थापित गर्नु, अन्तर्राष्ट्रिय लगानी आकर्षित गर्नु र नेपालको खेल अर्थतन्त्र सुदृढ बनाउने दिगो साझेदारी निर्माण गर्नु रहेको राजकर्णिकारले बताए । 

समिटका अर्का आयोजक आमिर अख्तरले नेपाल स्पोर्ट्स समिट केवल एउटा कार्यक्रम नभई खेल, कूटनीति, पर्यटन र आर्थिक विकासलाई एकीकृत गर्ने राष्ट्रिय अभियान भएको बताए । उनले समिटको उद्देश्य नेपालको खेल इकोसिस्टमलाई विश्वव्यापी अवसरसँग जोड्दै अन्तर्राष्ट्रिय सहकार्यमार्फत देशको खेल भविष्यलाई रूपान्तरण गरेको स्पष्ट पारे ।

नेपालको खेलकुद  फरक कालखण्डमा प्रवेश गरिरहेको उल्लेख गर्दै राजकर्णिकारले नेपाली खेलकुदलाई व्यावसायिक मार्गमा  प्रवेश गराउनु आजको आवश्यकता भएको बताए । उनले एनएसएस २०२६ ले नेपालको खेल अर्थतन्त्रलाई सुदृढ बनाउन दिगो साझेदारी निर्माण गर्नु रहेको बताए । विश्व अर्थतन्त्रमा खेल अर्थतन्त्रले दुई प्रतिशतभन्दा बढी हिस्सा ओगटेको सन्दर्भ राख्दै उनले भने,'नेपालको अर्थतन्त्रमा पनि खेल अर्थतन्त्रको हिस्सा पुर्‍याउन यो समिट आयोजना गर्दै छौं ।'