मेलबर्न — दोस्रो वरीयताका इटालियन खेलाडी यानिक सिनरले मंगलबार तेस्रोपल्ट अस्ट्रेलियन ओपन टेनिस जित्ने अभियान सुरु गरेका छन् । यसक्रममा उनी सजिलै दोस्रो चरण पुगेका छन् । 

दिनको खेलमा सबैको ध्यान खिच्न भने जापानी स्टार नाओमी ओसाका सफल रहिन् । आफ्नो आकर्षक फेसनको मदतमा उनले सबैको ध्यान तान्न सफल भइन् । अर्कोतर्फ लोकप्रिय फ्रान्सेली खेलाडी गेल मोन्फिल्सले पहिलो चरणमै मेलबर्न पार्कबाट बिदाइ लिएका छन् । उनले आफ्नो अहिलेसम्मको यात्रालाई अविश्वसनीय भनेका छन् । 

इटालीका सिनर फ्रान्सेली प्रतिद्वन्द्वी ह्युगो गास्टनविरुद्ध ६–२, ६–१ ले अगाडि रहेको बेला खेल रोकिएको थियो । गास्टनले पेटको चोटका कारण खेल अगाडि बढाउन सकेनन् । खेलपछि दुईपल्टको विजेता सिनरले आफूले यस्तो जित अपेक्षा नगरेको बताए । उनले भने, ‘मैले सुरुमा ठूलो चुनौती अपेक्षा गरेको थिएँ र यस खेलमा आक्रामक भएर प्रस्तुत पनि भएको थिएँ ।’

उनले यसपल्ट लगातार तेस्रोपल्ट मेलबर्नमा उपाधि जित्ने हो भने आधुनिक टेनिसको इतिहासमा सर्बियाली नोभाक जोकोभिचको उपलब्धिको बराबरी गर्नेछन् । अर्कोतर्फ मोन्फिल्सले भने हारपछि बिदा लिए । उनी अस्ट्रेलियाका डेन स्वानीको हातबाट ६–७, ७–५, ६–४, ७–५ ले पराजित भए । यो खेल झन्डै चार घण्टा चलेको थियो । उनी ३९ वर्षका भइसकेका छन् । यो वर्षको अन्त्यसँगै उनले आफ्नो खेल जीवनबाट संन्यास लिइरहेका छन् ।

मोन्‌फिल्सले दर्शकलाई सम्बोधन गर्दै भने, ‘अहिलेसम्मको यात्रामा साथ दिने सबैलाई धन्यवाद । खेल्न सुरु गरेपछि एक दिन न एक दिन बिदा लिनुपर्ने हुन्छ ।’ उनले आफ्नो खेलजीवनमा कुल १३ एटीपी उपाधि जितेका छन् । सन् २००४ देखि खेल्न सुरु गरेका मोन्फिल्सले दुई महिनाअगाडि मात्रै आफ्नो सन्यास योजना सुनाएका थिए । 

दिनका अन्य खेलमा इटालीका पाँचौं वरीयताका लोरेन्जो मुसेटी पनि दोस्रो चरण पुगे । बेल्जियमका राफे कोलिटनले चोट कारण खेल परित्याग गरेपछि लोरेन्जो अगाडि बढेका हुन् । आठौं वरीयता तथा गत वर्ष सेमिफाइनल खेलेका अमेरिकी बेन सेल्टनले फ्रान्सको युगो हम्बर्टलाई ६–३, ७–६, ७–६ ले पराजित गरे । यस्तै उदीयमान ब्राजिलका १९ वर्षीय खेलाडी जाओ फोनेस्का अमेरिकी इलिट स्पिजिरीसँग ६–४, ७–६, ७–६ ले हारे । 

महिलातर्फ पूर्व नम्बर एक खेलाडी ओसाका दिनको अन्तिम खेलमा सेतो आकर्षक लुगा लगाएर रड लेभर एरिनामा प्रवेश गरेकी थिइन् । जापानकी २८ वर्षीया ओसाका कोर्टभित्र र बाहिर आफ्नो फेसन शैलीका कारण चर्चित रहने गरेकी छन् । सेतो छातासहित सेतै टोपी लगाएर उनी कोर्टमा प्रवेश गरेपछि दर्शक आश्चर्यचकित भएका थिए ।