सुनसरी — तेस्रो कोशी प्राइड लिग (केपीएल) क्रिकेटको अक्सनमा पूर्वेली सुपर किंग्सले खेलाडी अनुबन्धनका लागि सर्वाधिक रकम खर्च गरेको छ । विभिन्न सात फ्रेन्चाइज टिमले फागुन ९ देखि २१ सम्म सुनसरीको भोक्राह नरसिंहस्थित डा. खालिल आजाद मैदानमा हुने प्रतियोगिताको लागि अक्सनबाट समान १२ खेलाडी अनुबन्ध गर्दा पूर्वेलीले ४ लाख १८ हजार रकम खर्चेको हो । 

काठमाडौंको गोर्खा एभेञ्जर्सले ४ लाख रुपैयाँ खर्च गरेको छ । बिर्तामोड हिड्सले ३ लाख ६८ हजार खर्च गर्दा इटहरी आदर्श जाइन्ट्सले ३ लाख ६४ हजार, काठमाडौंको एभरेस्ट थन्डर्सले ३ लाख ४० हजार, इटहरीको नमुना ब्लास्टर्डले ३ लाख २० हजार र सबैभन्दा कम भोक्राह नरसिंह कोशी अर्नाजले २ लाख ५० हजार खर्च गरेका छन् ।

अक्सनमा हरेक टिमले ड्राफ्टबाट एक मार्की र एक आइकोनिक गरी ३ देखि ६ खेलाडी अनुबन्ध गरेका छन् । अक्सनमा २ सय ३२ खेलाडी समावेश भएकामा ८४ खेलाडी बिक्री भए । क्याटगोरी ‘ए’ मा ३४, क्याटगोरी ‘बी’ मा ९५ र क्याटगोरी ‘सी’ मा १०३ खेलाडी थिए ।

अक्सनमा क्याटगोरी ‘ए’ को मूल्य न्यूनतम ४५ देखि ६५ हजार, ‘बी’ का लागि २५ देखि ४५ हजार तथा ‘सी’ को मूल्य ५ हजारदेखि २५ हजारसम्म तोकिएको थियो । ड्राफ्टबाट खेलाडी भित्र्याउँदा टिमले आवश्यकताअनुसार रकम खर्च गर्न पाउने सुविधा थियो ।