काठमाडौँ — नेपालले महिला ट्वान्टी–२० विश्वकप ग्लोबल छनोटको पहिलो खेलमा थाइल्यान्डविरुद्ध पहिला ब्याटिङ गरिरहेको छ ।

थाइल्यान्डले आइतबार टस जितेपछि त्रिवि क्रिकेट अन्तर्राष्ट्रिय रंगशाला कीर्तिपुरमा नेपाललाई ब्याटिङका लागि बोलाएको थियो ।

नेपालले आक्रामक सुरुवात दिलाएकी ओपनर सम्झना खड्कालाई गुमाएको छ । उनले मात्र ११ बलमा २६ रन जोडिन् । नेपालले यतिबेला ९ ओभरको समाप्तिमा एक विकेट गुमाएर ६४ रन बनाएर खेलिरहेको छ । 

इन्दु बर्माको कप्तानीमा रहेको नेपालबाट सम्झना खड्का, विन्दु रावल, काजल श्रेष्ठ, पुजा महतो, रुविना क्षेत्री, कविता जोशी, कविता कुँवर, सीता रानामगर, रिया शर्मा, सोमु विष्ट खेलिरहेका छन् ।

नेपाल सन् २०११ यता थाइल्यान्डमाथि पहिलो विजय हात पार्ने आशामा रहेको छ । गत वर्ष त्रिकोणात्मक शृंखलामा थाइल्यान्डसँगको तीनै खेलमा नेपाल पराजित रहेको थियो । गत वर्षको मार्चमा बैंककमा भएको एसिया छनोटमा विजेता र उपविजेता बन्दै थाइल्यान्ड र नेपाल यस प्रतियोगिताका लागि छनोट भएका थिए ।