माघ ३ गते हुने प्रतियोगितामा २ सय १० खेलाडीले विभिन्न १३ स्पर्धामा प्रतिस्पर्धा गर्नेछन् ।
काठमाडौँ — काठमाडौं महानगरपालिका वडा ८ को सहयोग तथा पिङ्ला तेक्वान्दो डोजाङको आयोजनामा वडा अध्यक्ष तेक्वान्दो प्रतियोगिता हुने भएको छ ।
माघ ३ गते हुने प्रतियोगितामा २ सय १० खेलाडीले विभिन्न १३ स्पर्धामा प्रतिस्पर्धा गर्ने संयोजक वडा ८ का अध्यक्ष आशामान संगतले मंगलबार पत्रकार सम्मेलनमा बताए ।
ग्योरोगी जुनियर पुरुषमा ४५ केजी, ४८ केजी र ५१ केजीमुनि तथा महिलामा ४२ केजी र ४६ केजीमुनि तथा सिनियर पुरुषमा ५४ केजी, ५८ केजी, ६३ केजी र ६८ केजीमुनि तथा महिलामा ४६ केजीमुनि, ४९ केजी, ५३ केजी र ५७ केजीमुनि तौल समूहमा प्रतिस्पर्धा हुने सह–संयोजक एवं आयोजक डोजाङका अध्यक्ष सुरेन्द्र डंगोलले बताए ।
हरेक स्पर्धामा शीर्ष तीन स्थान हात पार्ने खेलाडीले क्रमशः ४ हजार, ३ हजार र २ हजार पुरस्कार प्राप्त गर्ने छन् । आयोजकका अुनसार विश्व तेक्वान्दो महासंघ र नेपाल तेक्वान्दो संघको नियमअनुसार हुने प्रतियोगिताको अनुमानित बजेट ५ लाख ८७ हजार रुपैयाँ रहेको छ । एकदिने प्रतियोगिताका खेल जयबागेश्वरीस्थित गोल्डेन दरबार बैंक्युटमा खेलाइने छ ।
