काठमाडौँ — नेपालले अर्को महिना हुने ट्वान्टी–२० विश्वकप तयारीका क्रममा श्रीलंकाको कोलम्बो र भारतको मुम्बईमा अभ्यास खेल खेल्ने भएको छ ।

नेपाल क्रिकेट संघ (क्यान) ले जनाएअनुसार नेपालले कोलम्बोमा श्रीलंका ‘ए’ सँग तीन खेल्ने छ ।

नेपालले जनवरी २० मा एसएलएलडीसीमा, २२ र २४ मा कोल्ट्समा तीन खेलको शृंखला खेल्नेछ । नेपालले दोस्रो चरणको तयारीमा मुम्बईमा थप दुई खेल्ने क्यानले मंगलबार जनाएको छ । त्यसक्रममा नेपालले जनवरी २९ र ३१ मा मुम्बई क्रिकेट एसोसिएसन प्रेसिडेन्ट ११ सँग दुई खेल खेल्नेछ । दोस्रो खेल दिवारात्रि हुने जनाइए पनि खेलस्थल तोकिएको छैन ।

नेपालले रोहित पौडेलको कप्तानीमा यसअघि नै १५ सदस्यीय विश्वकप टोली घोषणा गरिसकेको छ । नेपालले तेस्रो पटक ट्वान्टी–२० विश्वकप खेल्न लागेको हो । नेपालले यसअघि सन् २०१४ र २०२४ मा ट्वान्टी–२० विश्वकप खेलेको थियो ।