काठमाडौँ — न्यु डायमन्ड युथ स्पोर्ट्स क्लबले केएनपी नेरोलेक नवौं शेरबहादुर खड्का स्मृति राष्ट्रिय महिला भलिबल प्रतियोगितामा च्याम्पियन बनेको छ ।

शनिबार प्रतियोगिताको फाइनलमा न्यु डायमन्डले निकट प्रतिद्वन्द्वी नेपाल पुलिस क्लबलाई ३–१ को सेटमा हराएर उपाधि जितेको हो । न्यु डायमन्ड दोस्रो पटक च्याम्पियन बन्यो । यसअघि टोली सातौं संस्करण जितेको थियो ।

त्रिपुरेश्वरस्थित राखेप कभर्डहलमा भएको फाइनल साबिक विजेता पुलिसले २५–२२, २५–१८, १५–२५, २७–२५ ले सेट गुमाएको थियो । लगातार दुई सेट जितेर विजयतर्फ लम्किएको न्यु डायमन्डले तेस्रो सेटमा लय समात्न सकेन । पुलिसले डायमन्डलाई १५ अंकमै रोक्दै सेट आफ्नो पक्षमा पारेर पुनरागमन गरेको थियो । चौथो सेटमा पुलिसले आफ्नो अग्रता फराकिलो बनाइसकेको अवस्थामा न्यु डायमन्ड खेलमा फर्कियो । अपोजिट हिटर प्रतिभा माली, सलिना बुढामगर र मिडल ब्लकर सुमित्रा रेग्मीले लगातार अंक लिएपछि न्यु डायमन्डले कडा प्रतिस्पर्धा झेल्दै खेलमा आफ्नो पक्षमा पारेको थियो ।

एक साताअघि सम्पन्न एनभीए क्लब च्याम्पियनसिपको फाइनलमा पनि पुलिसलाई हराएर न्यु डायमन्डले उपाधि जितेको थियो । च्याम्पियन बन्ने क्रममा दुवै प्रतियोगितामा न्यु डायमन्ड अपराजित रह्यो ।

अस्ट्रेलियाबाट फर्केकी सिनियर खेलाडी प्रतिभा मालीको आगमनले न्यु डायमन्ड बलियो स्थितिमा देखिएको थियो । फाइनलमा प्रतिभाले सर्वाधिक २५ अंक बटुल्दा स्पाइकबाटै १९ अंक जोडेकी थिइन् । सुमित्राले १५ र सलिनाले १४ अंक लिएका थिए । पुलिसका लागि पुनम चन्दले सबैभन्दा धेरै २१, उषा भण्डारीले २० र रिमा कुँवरले ८ अंक जोडेका थिए । स्पाइकबाट पुनमले २० र उषाले १७ अंक लिएका हुन् । न्यु डायमन्डकी प्रगति नाथ फाइनलकी प्लेयर अफ द म्याच घोषित भइन् ।

लिग चरणमा विजेता न्यु डायमन्डले त्रिभुवन आर्मीलाई ३–०, एपीएफलाई ३–२ र पुलिसलाई ३–२ सेटले हराएको थियो । शेरबहादुर खड्का स्मृति प्रतिष्ठानले बहुराष्ट्रिय पेन्ट्स कम्पनी केएनपी नेरोलेकको मुख्य प्रायोजनमा आयोजना गरेको प्रतियोगितामा सुरुका ६ संस्करणको उपाधि विजेता एपीएफ क्लबले तेस्रो स्थानमा सीमित भयो । शनिबारै एपीएफले आर्मीलाई २५–१३, २५–२३, २५–१८ को सोझो सेटमा हराएको थियो । एपीएफकी मीना सुनार प्लेयर अफ द म्याच भइन् ।

विजेताले ५ लाख, उपविजेताले २ लाख ५० हजार र तेस्रो हुने टोलीले १ लाख २५ हजार रुपैयाँ पुरस्कार प्राप्त गरे ।

न्यु डायमन्डकी प्रतिभा माली सर्वोत्कृष्ट चुनिइन् । प्रतिभाले ५० हजारसहित ट्रफी जितिन् ।