काठमाडौँ — प्रकृत तामाङ, सोहम अग्रवाल र अवानी राई फाल्डो जुनियर टुर एसिया ग्रान्ड फाइनलमा छनोट हुन सफल भएका छन् । आ–आफ्नो उमेर समूहको च्याम्पियन बन्दै उनीहरू छनोट भएका हुन् ।

प्रकृत ओभरअल र ब्वाइज १७ देखि २१ वर्ष उमेर समूहको विजेता बन्न सफल रहे । उनले शुक्रबार इभन–पार ६८ स्कोर गर्दै समग्रमा ९ ओभर २ सय १३ सहित च्याम्पियन बनेका हुन् । उनले पहिलो दुई दिनका लिडर स्वप्निल भट्टराईलाई २ स्ट्रोकले हराए ।

तेस्रो दिनको सुरुआत गर्दा ३ स्ट्रोकले पछि परेका प्रकृतले फ्रन्ट नाइन १ अन्डर ३३ खेल्दा स्वप्निललाई १ स्ट्रकले पछि पारिसकेका थिए । प्रकृतले पहिलो र चौथो होलमा इगलको सफलता प्राप्त गरे । तेस्रो र छैटौं होलमा बोगी र सातौं होलमा डबल बोगी खेपे । आठौं होलमा एक सट बचाए । स्वप्निलले भने ३ ओभर ३६ मा फ्रन्ट नाइन सकाए ।

यसपछि ब्याक नाइनमा प्रकृतले १ ओभर ३५ खेले । १५ औं होलको बर्डीका विरुद्ध १४ औं र १७ औं होलमा बोगी खेपे । स्वप्निलले भने ब्याक नाइन २ ओभर ३६ खेले । दिनको खेलमा ५ ओभर ७३ खेलेका स्वप्निलले समग्रमा ११ ओभर २ सय १५ सहित दोस्रो भए । सिद्धान्त सापकोटा तेस्रो भए । उनले १० ओभर ७८ खेल्दा समग्रमा २९ ओभर २ सय ३३ स्कोर गरे ।

ब्वाइजको १२ देखि १६ वर्षको उमेर समूहमा सोहम अग्रवाल समग्रमा १७ ओभर २ सय २१ सहित पहिलो भए । शुक्रबार ११ ओभर ७९ खेलेका सोहमले रुबेन थापालाई ४ स्ट्रोकले हराए । दिनको खेलमा फ्रन्ट नाइन ५ ओभर ३९ खेलेका उनले दोस्रो, तेस्रो र पाँचौं होलमा १–१ सट खेर फाल्दा नवौं होलमा डबल बोगी प्रहार गरे । यसपछि १० औंदेखि १३ औं होल तथा १६ औं र १७ औं होलको बोगीले ब्याक नाइन ६ ओभर ४० मा सकाए ।

आज ६ ओभर ७४ खेल्दै रुबेन समग्रमा २१ ओभर २ सय २५ सहित दोस्रो भए । १२ ओभर ८० सहित समग्रमा २ सय ४५ खेलेका ड्यानियल बानियाँ तेस्रो भए ।

गर्ल्सतर्फ नेपालकी अवानी राई पहिलो भइन् । उनले बेलायतकी एमिली लो ग्लुडाइसलाई १ स्ट्रोकले पराजित गरिन् । अवानीले शुक्रबार १७ ओभर ८५ खेल्दा समग्रमा २ सय ५२ स्कोर गरिन् । दिनको खेलमा १८ ओभर ८६ खेल्दै समग्रमा २ सय ५३ सहित एमिली दोस्रो भइन् । यस्वी श्रेष्ठ तेस्रो भइन् । उनले समग्रमा २ सय ७० स्कोर गरिन् ।

खेल सुरु हुँदा अवानी र एमिली बराबरको स्कोरमा थिए । फ्रन्ट नाइनमा ३९ स्कोर गर्दै एमिलीले २ स्ट्रोकको अग्रता बनाइन् । तर ब्याक नाइनमा १३ ओभर ४७ खेलेसँगै १ स्ट्रोकले पछि पर्दै दोस्रो स्थानमा चित्त बुझाइन् । अवानीले फ्रन्ट नाइनमा ४१ र ब्याक नाइनमा ४४ को स्कोर निकालिन् ।