सुनसरी — झापा दमकको आस्था कलेज इटहरीमा जारी तेस्रो अन्तरकलेज टी–२० क्रिकेट प्रतियोगिताको सेमिफाइनलमा प्रवेश गरेको छ।

बिहीबार सम्पन्न लिग चरणको अन्तिम खेलमा पूर्वाञ्चल ईञ्जिनियरिङ क्याम्पस धरानलाई ६ विकेटले पराजित गर्दै आस्था सेमिफाइनल यात्रा तय गर्ने अन्तिम टोली बनेको हो। यसअघि विराटनगरको कान्तिपुर कलेज, इटहरीको विश्व आदर्श र नमुना कलेज अन्तिम चारमा प्रवेश गरिसकेका छन्। 

इटहरीस्थित जनता क्रिकेट मैदानमा टस जितेर पहिले ब्याटिङ गरेको पूर्वाञ्चलले १६ ओभरमा छोट्याइएको खेलमा सबै विकेट गुमाउँदै ७८ रन बनाएको थियो। अजित अटलले १७ रन बनाउँदा विवस भण्डारीले १३ र काशी सन्जेलले १२ रन बनाए। आस्था कलेजका सुगम बुढाथोकीले ३ तथा छविलाल खड्का, रञ्जन धमला र सौजन घिमिरेले समान २–२ विकेट लिए । आशिष रानाको नाममा १ विकेट रहृयो।

जवाफमा ७९ रनको विजयी लक्ष्य  पाएको आस्थाले ११ ओभरमै ४ विकेटको क्षतिमा पूरा गर्‍यो । आस्थाका सन्तोष गजमेरले १७, भुपाल दंगालले १५ र हिमान्शु गिरीले ११ रन जोडे। बलिङतर्फ पूर्वाञ्चल इन्जिनियरिङका अजित अटलले २ विकेट लिँदा काशी सन्जेल र अनुपम भुजेलले समान १–१ विकेट हात पारे। खेलको प्लेयरअफद म्याच आस्थाका सुगम बुढाथोकी घोषित भए।