काठमाडौँ — शेरबहादुर खड्का स्मृति प्रतिष्ठान, बालकोटको आयोजनामा हुने नवौं शेरबहादुर खड्का स्मृति राष्ट्रिय महिला भलिबल प्रतियोगिता बुधबारदेखि सुरु हुँदै छ ।

आयोजकले तयारी भएको जनाएको छ । ४ दिनसम्म त्रिपुरेश्वरस्थित राष्ट्रिय खेलकुद परिषद्को कभर्डहलमा हुने प्रतियोगिताको पहिलो दिन २ खेल हुने प्रतिष्ठानका अध्यक्ष रञ्जन खड्काले जनाए । 

पहिलो खेल सातौं संस्करणको विजेता न्यु डायमन्ड युथ स्पोर्ट्स क्लब र नेपाली आर्मी तथा दोस्रो खेल साविक विजेता नेपाल प्रहरी र सुरुका ६ संस्करणको विजेता एपीएफ क्लबबीच हुनेछ । राउन्ड रोविन लिगका आधारमा हुने प्रतियोगितामा यिनै ४ टिम सहभागी छन् । राउन्ड रोविन लिगमा शीर्ष २ स्थानमा रहने टिमले पुनः उपाधिका लागि खेल्नेछन् ।

केएनपी नेरोलेकको मुख्य प्रायोजनमा हुने प्रतियोगिताको कुल पुरस्कार राशी १३ लाख रुपैयाँ रहेको छ । विजेताले ५ लाख, उपविजेताले २ लाख ५० हजार र तेस्रो हुने टोलीले १ लाख २५ हजार नगद पुरस्कार प्राप्त गर्नेछन् । प्रथम पुरस्कार लाइफ इन्स्योरेन्स कोर्पोरेसन नेपाल लिमिटेड, दोस्रो पुरस्कार मार्बल टेक्नोप्लास्ट प्रालि र तेस्रो पुरस्कार फिट्नेस च्वाइसले प्रायोजन गरेको आयोजकले जनाएको छ ।