बेंसीसहर — लमजुङ मर्स्याङ्दी क्लब इन्जुरी समयको अन्तिम क्षणमा चुक्दा साबिक विजेता विभागीय एपीएफ क्लब लमजुङमा जारी ३३औं त्रिवेणी कप फुटबल प्रतियोगिताको फाइनलमा प्रवेश गरेको छ ।

बेंसीसहरको सहजीस्थित खेल मैदानमा शनिबार सम्पन्न सेमिफाइनलमा एपीएफले लमजुङ मर्स्याङ्दीलाई टाइब्रेकरमा ४–३ गोलले पराजित गर्दै उपाधि नजिक पुगेको हो । 

निर्धारित समय १–१ गोलको बराबरीमा सकिएपछि खेल अतिरिक्त समयमा गयो । थप १०–१० मिनेटको समयमा पनि दुवै टोलीले गोल गर्न नसक्दा निर्णय टाइब्रेकरबाट गरिएको थियो ।

टाइब्रेकरमा एपीएफका अनिश घर्ती क्षेत्री, सन्तोष खत्री, युवराज खड्का र विश्वास उदासले गोल गरे । दीपेश धिमाल र महेश लामा भने गोल गर्न असफल भए । मर्स्याङ्दीका अरोन थापा, विदेशी खेलाडी विलियम एलेन र निग्मा मगरले गोल गरे । पोषण थापा, अभिषेक महतो र अविनाश स्याङ्तानको प्रहार सफल हुन सकेन ।