पोखरा — आयुषमान हजुर घलेलाई फाइनलमा पराजित गर्दै भारतबाट आएका नेपाली खेलाडी करणबहादुर थापाले २२ औं माछापुच्छ्रे बैंक पोखरा ओपन तथा भेट्रान्स टेनिस प्रतियोगिताको मेन्स सिंगल्सतर्फको उपाधि जितेका छन् । पोखरा रंगशालामा बुधबार उनले घलेलाई ६–०, ४–६ र ६–३ को सेटमा पराजित गरे ।

उनले ८० रुपैयाँ प्राप्त गर्दा दोस्रो स्थानमा चित्त बुझाएका आयुषमानले ४० हजार रुपैयाँ पाए । ३५ वर्ष माथिको मेन्स सिंगल्समा जीतेन्द्र परियारले बाजी मारे ।

फाइनल सन्तोष खत्रीलाई ६–१, ६–० को सेटमा पराजित गर्दै उनले उक्त उपाधि आफ्नो नाम गराएका हुन् । जीतसँगै जीतेन्द्रले ६० हजार र सन्तोषले ३० हजार रुपैयाँ प्राप्त गरे । यसअघि बिहीबार वुमन्स सिंगल्सतर्फ शिभाली गुरुङले उपाधि जितेकी थिइन् ।