पोखरा — पोखरामा जारी २२ औं माछापुच्छ्रे कप पोखरा ओपन तथा भेट्रान्स अन्तर्राष्ट्रिय टेनिस प्रतियोगितामा राप्रपा नेतासमेत रहेका कमल थापाले दोहोरो उपाधि जितेका छन् । उनले पोखरा रंगशाला टेनिस कम्प्लेक्समा सोमबार ६५ वर्षमाथिको एकल र डबल्सतर्फको उपाधि जितेका हुन् ।

उनले एकलतर्फ पोखराका पदम गुरुङलाई ४–२ र ४–० को सेटमा पराजित गरे । डबल्सतर्फ छ्याम्बा ढुन्डुपलाई जोडी बनाएका उनले ध्रुव गुरुङ र विदुर विष्टको जोडीलाई ४–१ र ४–१ को सटेमा पराजित गर्दै उपाधि जिते ।

कास्की जिल्ला टेनिस संघको आयोजनामा भइरहेको प्रतियोगिताअन्तर्गत खुलातर्फ मेन्स डबल्स उपाधि प्रदीप खड्का र आयुषमान हजुर घलेको जोडीले जितेको छ । सोमबार भएको फाइनल खेलमा उक्त जोडीले नेहाल जंगबहादुर थापा र राजवीर प्रधानको जोडीलाई ६–०, ६–१ को सेटमा पराजित गर्दै उपाधि जितेका हुन् ।

३५ वर्षमाथिको मेन्स डबल्समा जितेन्द्र परियार र कुमार अधिकारीको जोडीले उपाधि जिते । फाइनलमा सन्तोष खत्री र भीष्मजंग गुरुङको जोडीलाई ६–४ र ६–२ को सेटमा पराजित गर्दै जितेन्द्रको जोडीले उक्त उपाधि रक्षा गरेको हो । ४५ वर्षमाथिको मेन्स डबल्सतर्फ देव क्षेत्री र हिमाल शाहको जोडी पहिलो भयो । यो जोडीले फाइनल खेलमा रोहित सुनुवार र जोली टार्गेनको जोडीमाथि ६–२ र ३–६ र सुपरटाइमा १०–५ को रोचक जित निकालेको हो ।

५५ वर्षमाथिको डबल्स उपाधि उत्तमकुमार लामा र जितेन्द्र प्रधानको जोडीले जितेको छ । प्रतिस्पर्धात्मक फाइनल खेलमा विमलकुमार गुरुङ र हिमाल शाहको जोडीमाथि ४–६, ७–६ र ११–९ को नतिजा निकाल्दै उक्त जोडीले उपाधि रक्षा गरेको हो । एकलतर्फ प्रदीप खड्काले प्रितम परियारलाई, आयुषमान हजुर घलेले नेहाल जंगबहादुर थापालाई, करणबहादुर थापाले दर्शिल श्रेष्ठलाई तथा राजवीर प्रधानले उगेन शेर्पालाई पराजित गर्दै अन्तिम चारमा स्थान सुरक्षित बनाए ।