गुल्मी — दोस्रो संस्करणको नेपाल प्रिमियर लिग (एनपीएल) विजेता टोली लुम्बिनी लायन्स ट्रफी लिएर गुल्मी आइपुगेको छ ।

शनिबार साँझ गुल्मी आइपुगेको ट्रफी आइतबार बिहान धार्मिक तथा पर्यटकीय प्रसिद्ध स्थल रेसुंगा यज्ञशालामा प्रदर्शन गरिएको छ ।

ट्रफी प्रदर्शन कार्यक्रममा लुम्बिनी प्रदेशबाट प्रतिनिधित्व गर्ने लुम्बिनी लायन्सको एनपीएलको ट्रफी प्राप्त गर्न सफल टोलीलाई सम्मान गरिएको नगरपालिकाका प्रमुख प्रशासकीय अधिकृत बाबुराम पल्लीले जानकारी दिए ।

रेसुंगा माध्यमिक विद्यालयका विद्यार्थीको बाजागाजा टोलीसहित नगरपालिकाले रेसुंगा क्षेत्रमै पुगेर भव्य स्वागत तथा सम्मान गरेका हुन् ।

ट्रफी सहितको लुम्बिनी लायन्स टोलीमा गुल्मेली खेलाडी बलर तिलकराज भण्डारी पनि सहभागी छन् । बैशाख २५ गते नगर स्थापना दिवसको अवसरमा खेलाडी भण्डारीलाई नगद २५ हजार रुपैयाँसहित सम्मान गर्ने नगरप्रमुख खिलध्वज पन्थीले घोषणा गरे । 

तिलकराज भण्डारीले गुल्मी जिल्लासँग जोडिएर क्रिकेट खेल्न पाउनु गर्वको कुरा भएको बताए । उनले निमन्त्रणा गरेकोमा सबैलाई धन्यवाद दिए ।

रेसुंगा नगरपालिका प्रमुख खिलध्वज पन्थीले खेलप्रति आकर्षण र खेलाडीको सम्मानका लागि समग्र खेलकुदको विकासलाई अगाडि बढाइएको बताए । ‘लुम्बिनी लायन्सले एनपीएल ट्रफी जित्नु लुम्बिनीबासीकै लागि गौरवको कुरा हो’, उनले भने, ‘यसरी जिल्लाजिल्लाका सम्मान गर्नुले यसको उचाई अझै बढ्छ ।’