विजेताले १२ लाख रुपैयाँ पुरस्कार पाउने
लमजुङ — लमजुङ सदरमुकाम बेंसीसहरमा आज शनिबारदेखि त्रिवेणी कप राष्ट्रव्यापी फुटबल प्रतियोगिताको ३३ औं संस्करण सुरु हुँदैछ ।
बेंसीसहरको सहजीस्थित खेलमैदानमा आयोजना हुने प्रतियोगिताको पहिलो खेल साविक विजेता विभागीय टीम सशस्त्र प्रहरीको एपीएफ फुटबल क्लब र सुन्दरबजार फुटबल क्लबबीच दिउँसो २ बजे हुनेछ ।
आयोजक त्रिवेणी युवा क्लबका अध्यक्ष टेकजङ गुरुङले पहिलो दिन उद्घाटन खेल भएकाले एउटामात्रै खेलाइने र त्यसपछि फाइनल बाहेक हरेक दिन २ वटा खेल खेलाइने बताए ।
विजेताले १२ लाख रुपैयाँ, ट्रफी, मेडल र प्रमाणपत्र पाउनेछन् । उपबिजेताले ६ लाख रुपैयाँ, मेडल र प्रमाणपत्र पाउनेछन् ।
यस्तै, सर्वोत्कृष्ट खेलाडी, सर्वाधिक गोलकर्ता र उत्कृष्ट गोल किप्परले जनही २५/२५ हजार, ट्रफी र प्रमाणपत्र पाउनेछन् । प्रत्येक खेलको म्याद अफ दि म्याचलाई १० हजार रुपैयाँ र ट्रफी प्रदान गरिने आयोजकले जनाएको छ । प्रतियोगितामा यसवर्ष १६ टीमको सहभागिता रहने छन् ।
प्रतियोगितामा गतवर्ष सेमीफाइनलमा पराजित २ टीमलाई २/२ लाख रुपैयाँ दिँदै आएकोमा यसवर्षदेखि हटाइएको छ । १५ पुस तमू ल्होसारको साँझ आयोजना हुने त्रिवेणी साँझसमेत गरी प्रतियोगिता सञ्चालनका लागि १ करोड ३२ लाख ३५ हजार रुपैयाँ लाग्ने अनुमान गरिएको छ ।
