विराटनगर — साविक विजेता सरस्वती स्कुलले चौथो विराटनगर हव अन्तरस्कुल क्रिकेट प्रतियोगिताको उपाधि जितेको छ ।

नेपाल क्रिकेट फाउण्डेशनको आयोजनामा मेरिलेवोन विराटनगर ज्वाला क्रिकेट मैदानमा बुधबार सम्पन्न फाइनल खेलमा सरस्वती स्कुलले सत्यनारायण स्कुललाई ४० रनले पराजित गर्दै उपाधि हात पारेको हो ।

टस जितेर ब्याटिङ गरेको सरस्वतीले निर्धारित २० ओभरको खेलमा १७ दशमलब १ ओभरमा सबै विकेट गुमाउँदै ८३ रनको सामान्य योगफल बनायो । सरस्वतीका विकाश कामत र रोहित कामतले समान १९–१९ रनबाहेक अन्यले दोहोरो अंक बनाउन सकेनन् । सत्यनारायणका मनिष कामत, राहुल यादव र शत्रुधन चौधरीले समान २–२ विकेट लिए ।

जवाफमा ८४ रनको लक्ष्य पछ्याएको सत्यनारायण सस्तैमा समेटियो । १२ दशमवल ३ ओभरमा सबै विकेट गुमाउँदै ४३ मात्रै बनायो । सत्यनारायणका सागर यादवले सर्वाधिक १६ रन बनाए । अन्य खेलाडीले दोहोरो अंक जोड्न सकेनन् । सरस्वतीका प्रशान्त यादवले ४ विकेट लिँदा सुरज मण्डलले ३ विकेट हात पारे ।

फाइनल खेलको प्लेयर अफ द म्याच सरस्वतीका प्रशान्त यादव र सुरज मण्डल संयुक्त रूपमा घोषित भए । प्लेयर अफ द सिरिज ग्रिनपिस स्कुलका मिराज शेख बने । त्यसैगरी, उत्कृष्ट ब्याटर ग्रिनल्याण्ड स्कुलका प्रिन्स यादव र उत्कृष्ट बलर सरस्वती स्कुलका प्रशान्त यादव भए ।