सहभागी टोलीले १८ खेलाडी राख्नुपर्नेछ, जसमा एक मार्की, एक आइकोनिक, तीन जना ड्राफ्ट (जो राष्ट्रिय टिमका हुनेछन्), क्याटगोरी ‘ए’ का तीन, क्याटगोरी ‘बी’ का दुई तथा क्याटगोरी ‘सी’ का एक खेलाडी रहनेछन् । केपीएलका निर्देशक अफजल हुसैनले केपीएल आयोजनासँगै कोशी प्रदेश क्रिकेटको विकास र ग्रासरुट कार्यक्रम अझै प्रभावकारी हुने आशा गरे । 

आयोजकले छिट्टै अक्सन मिति घोषणा गर्ने बताएको छ । अक्सनका लागि खुला खेलाडी दर्ता प्रक्रिया सुरु गरिसकेको छ । अक्सनमा क्याटगोरी ‘ए’ को मूल्य ४५ देखि ६५ हजारसम्म, क्याटगोरी ‘बी’ को २५ देखि ४५ हजारसम्म तथा क्याटगोरी ‘सी’ को मूल्य ५ हजारदेखि २५ हजारसम्म राखिएको छ । 

क्यानका सचिव पारस खड्काले आइतबार आयोजित पत्रकार सम्मेलनमा घरेलु क्रिकेटलाई व्यावसायिक बनाउन यस्तो प्रतियोगिता हुन जरुरी रहेको बताए । संयोजक गोविन्द पौडेलले यो प्रतियोगिता मात्र नभई युवा प्रतिभाको पहिचान गर्ने स्थल भएको र यसले नेपाली क्रिकेट विकासमा मद्दत गर्ने धारणा राखे । सुनसरी जिल्ला क्रिकेट संघका अध्यक्ष तथा टेक्निकल हेड चेतनाथ पौडेलले कोशीले क्यान निलम्बन हुँदा पनि प्रतियोगिता आयोजना गर्दै आएको र यो लिगले खेलाडीको क्षमता बढाउन सहयोग पुग्ने जनाए । झापा जिल्ला क्रिकेट संघका अध्यक्ष प्रविन थापाले एनपीएलको चर्चापछि धेरै स्थानीय लिग सुरु हुँदै गएको बताए । उनले एनपीएलमा खेल्न नपाएका खेलाडीका लागि यो प्रतियोगितामा क्षमता देखाउने माध्यम बन्ने जनाए ।