काठमाडौँ — नेपाल प्रिमियर लिग क्रिकेटको दोस्रो संस्करणमा इमर्जिङ प्लेयरमा चुनिएका शेर मल्ल सुदूरपश्चिम एकेडेमी (एसपीए) कलेजको ब्रान्ड एम्बासडरमा नियुक्त भएका छन् ।

आइतबार कैलालीको धनगढीमा कलेजले उनलाई एक वर्षका लागि एम्बासडरका रूपमा नियुक्त गरेको एसपीएका निर्देशक सुवास शाहीले जनाए । 

एक वर्षका लागि गरिएको सम्झौतामा शेर र शाहीले सम्झौतापत्रमा हस्ताक्षर गरे । एनपीएलमा उत्कृष्ट प्रदर्शन गर्दै लुम्बिनीलाई च्याम्पियन बनाउन शेरले महत्त्वपूर्ण भूमिका खेलेका थिए । उनले प्रतियोगिता अवधिभर १७ विकेट लिँदै सनसनी मच्चाएका थिए र सर्वाधिक विकेट लिने खेलाडीको सूचीमा संयुक्त रूपमा पहिलो स्थानमा थिए । 

सुदूरपश्चिमबाट उदाएका खेलाडी र भविष्यमा क्रिकेटमा राम्रो गर्न सक्ने सम्भावनालाई हेरेर शेरलाई कलेजसँग जोडेको निर्देशक शाहीले बताए । शाहीले खेलाडीलाई खेलसँगै आर्थिक हिसाबमा पनि मजबुत गर्दै जाने उद्देश्यका साथ कलेजले ब्रान्ड एम्बासडर नियुक्त गरेको बताएका छन् ।