काठमाडौँ — आयोजक भ्याली पब्लिक हाइस्कुलका तीनै टोलीले १९ औं भ्याली पब्लिक अन्तरस्कुल बास्केटबल प्रतियोगितामा विजयी सुरुआत गरेका छन् ।

शुक्रबार सुरु प्रतियोगितामा भ्याली पब्लिकले सिनियर गर्ल्समा दुई, जुनियर र सिनियर ब्वाइजको तीनै टोलीले जित पाए । गर्ल्समा भने भ्याली पब्लिक ‘ए’ र ‘बी’ दुवै टिम विजयी भए । समूह ‘ए’ मा आयोजक ‘ए’ ले टीआईएलाई ३२–२५ स्कोरले हरायो । भ्यालीका लोरिसा गौचनले सर्वाधिक ११ स्कोर गरिन् । समूह ‘एच’ मा भ्याली पब्लिक ‘बी’ ले इडन ब्रिज एकेडेमीलाई २२–१७ स्कोरले हरायो । सानीमाया तामाङले १० स्कोर जोडिन् ।

सिनियर र जुनियर ब्वाइज दुवैमा भ्याली पब्लिकले भद्रकालीलाई हरायो । सिनियरमा भ्याली पब्लिक ‘ए’ ले भद्रकालीलाई ४७–३२ ले पराजित गर्दा अशोक बिकले २६ स्कोर गरे । समूह ‘ए’ मा आयोजक ‘ए’ टोली र भद्रकालीसहित बेलमन्ट र ग्रिनल्यान्ड छन् । जुनियरमा आयोजक भ्यालीले भद्रकालीलाई १४–९ स्कोरले हरायो । विजेताका पूर्णराज तामाङले ९ स्कोर गरे । यो समूह ‘एफ’ का अरू टोलीमा एन्जल हार्ट र राजन मेमोरियल छन् । इडेन ब्रिजले सेन्ट जोसेफलाई २१–१५ र बीएनएले बीएमसीएलाई ३१–२४, क्यानभासले किङडमलाई १८–१४ स्कोरले हराए ।