नेपालगन्ज — आठौं मेयर कप राष्ट्रिय साइकल दौड प्रतियोगिताका विजेताले २५ हजार पुरस्कार पाउने भएका छन् । गत वर्षभन्दा यो वर्ष पुरस्कार राशि घटाइएको छ ।

सातौं संस्करणलाई ५० हजार पुरस्कार राखिएको थियो । मंसिर २० गते नेपालगन्जको बीपी चोकबाट सुरु हुने प्रतियोगितामा पाँच विधामा प्रतिस्पर्धा गराउने तयारी गरिएको छ। ३६ किलोमिटरको एमटीबी खुल्ला दौडका विजेतालाई २५ हजार, द्वितीयलाई १५ हजार र तृतीयलाई १० हजार पुरस्कार राखिएको छ। यो विधामा राष्ट्रिय खेलाडीसहित १९ जनाले प्रतिस्पर्धा गर्दै छन्।

बाँकेका खेलाडीले मात्रै सहभागी हुन पाउने दुई वटा विधा राखिएको छ। जसमा पुरुषमा २२ किलोमिटर र महिलाको १६ किलोमिटर दौड रहेको छ। ७८ जना सहभागी पुरुष र ९ जना सहभागी महिला दौडका विजेतालाई १० हजार, ७ हजार र ५ हजार पुरस्कार राखिएको छ।

२५ किलोमिटरको एमटीबी खुल्ला महिलातर्फ ८ जना सहभागी हुँदै छन्। यो विधामा प्रथमलाई २० हजार, द्वितीयलाई १५ हजार र तृतीयलाई १० हजार पुरस्कार राखिएको छ।

४५ वर्षमाथिकालाई समेटिएको एमटीबी मास्टरका विजेतालाई १५ हजार, २० हजार र ७ हजार पुरस्कार राखिएको छ। २५ किलोमिटरको यो विधामा १६ जनाले प्रतिस्पर्धा गर्दै छन्।