सुनसरी — सिरहाको सहलेस क्लबले अन्तर्राष्ट्रिय आमन्त्रण प्रथम गछिया गोल्डकप फुटबल प्रतियोगितामा विजयी सुरुवात गरेको छ । मोरङको सुन्दरहरैंचास्थित गछिया बजारको मैदानमा सोमबार सम्पन्न उद्घाटन खेलमा सहलेसले बेलबारी फुटबल क्लब मोरङलाई १–० गोल अन्तरले पराजित गर्दै सेमिफाइनलमा स्थान सुरक्षित गरेको हो । 

सहलेसलाई जिताउन रोमन भुजेलले गोल गरे । देवेन्द्र तामाङ, शिशिर लेखी र अबोयामी फकुन्ले जस्ता विदेशी खेलाडी लिएर मैदान उत्रिएको सहलेसका लागि खेलको ५५ औँ मिनेटमा भुजेलले गरेको गोल नै निर्णायक बन्यो । सहलेस अघिल्लो चरणको यात्रा तय गराउन निर्णायक गोल गरेका भुजेल खेलको ‘म्यान अफ द म्याच’ घोषित हुँदै नगद ५ हजार १ सय रुपैयाँ हात पार्न सफल भए ।