काठमाडौँ — नेपाल एसीसी यू-१९ प्रिमियर कपको उपविजेतामै सीमित भएको छ । सोमबार भएको फाइनलमा नेपाललाई घरेलु टोली यूएईले अजमानमा २७ रनले पराजित गर्‍यो ।

नेपालले टस जितेपछि ब्याटिङको निम्तो पाएको यूएई करवान मैदानमा ४५.५ ओभरमा १ सय ४७ रनमा अलआउट भएको थियो । तर जवाफमा आएको नेपाल पनि ३३.२ ओभरमा १ सय २० रनमा अलआउट भएपछि यूएईले उपाधि जितेको हो ।

यूएईका ओपनिङ बलरद्वय युगजय शर्मा र अली अस्गर सुम्सले ३–३ विकेट लिए । युगजयले ९ ओभरमा २ मेडन राख्दै ३७ र अली अस्गरले १० ओभरमा २ मेडन राख्दै १८ रन खर्चेका थिए । त्यस्तै उदिस सुरी र नुर उल्लाह अयोबीले २–२ विकेट लिए ।

ओपनर निरजकुमार यादव तथा निश्चल क्षेत्री १–१ रनमा आउट भएपछि नेपाल सुरुआतदेखि दबाबमा खेलेको थियो । दर्श सुनारले पनि खाता खोल्न सकेनन् । अर्का ओपनर वंश क्षेत्रीले ११ रन बनाए । आशिष लुथर र अशोक धामीले पाँचौँ विकेटका लागि ४४ रनको साझेदारी गरेका थिए ।