भानुजन माविको मैदानमा आइतबार भएको प्रतियोगिताको निर्धारित समयमा दुवैले समान एक/एक गोल गरेपछि छिनोफानो ट्राइबेकरमा पुग्नुपर्यो ।
ताप्लेजुङ — आठराई त्रिवेणी गाउँपालिकालाई ट्राइब्रेकरमा ३–१ गोलले पराजित गर्दै पाथीभरा याङवरक गाउँपालिका कञ्चनजंघा सेसेलुङ गोल्डकप महिला फुटबल प्रतियोगिताको सेमिफाइनलमा प्रवेश गरेको छ । सेमिफाइनलमा पुग्ने यो दोस्रो गाउँपालिका हो ।
भानुजन माविको मैदानमा आइतबार भएको प्रतियोगिताको निर्धारित समयमा दुवैले समान एक/एक गोल गरेपछि छिनोफानो ट्राइबेकरमा पुग्नुपर्यो । ट्राइब्रेकरमा पाथीभरा याङवरकको तर्फबाट अम्बिका लावती, स्मारिका श्रेष्ठ र अनुपमा राईले लगातार गोल गरे ।
आठराई त्रिवेणीको तर्फबाट कुमारी शेर्पा र प्रिती गुरुङले हानेको गोल पाथीभरा याङवरककी गोल किपर सन्दिला राईले रोकिन् भने ओङमु शेर्पाको प्रहार पोष्टबाट बाहिरियो । जेनीसा लिम्बूले मात्रै गोल गर्न सफल भइन् । खेलको म्यान अफ द म्याच पाथीभराकी गोल किपर सन्दिला भइन् । उनले नगद दुई हजार प्राप्त गरिन् ।
यसअघि आठराई त्रिवेणीको तर्फबाट प्रिती गुरुङले पहिलो हाफको १५ औं मिनेटमा गोलको खाता खोलेकी थिइन् । त्यसको दुई मिनेटपछि नै १७ औं मिनेटमा अम्बिका लावतीले सेन्टरबाट सिधै गोल पोष्टमा हानेका फ्रिकिक गोलमा परिणत भयो र खेल बराबरीमा फर्कियो ।
ताप्लेजुङका नौ मध्ये आठ पालिकाको सहभागिता रहेको प्रतियोगिताको तेस्रो दिनको खेलमा सोमबार फुङलिङ नगरपालिका र फक्ताङलुङ गाउँपालिका आमनेसामने हुनेछन् ।
चासोक तङनाम २०८२ को अवसरमा पालिकास्तरीय महिला फुटबल प्रतियोगिता आयोजना गरिएको छ । २० गते फाइनल हुने प्रतियोगिताका विजेताले २ लाख २ हजार र उपविजेताले १ लाख २ हजार रुपैयाँ प्राप्त गर्ने छन् ।
