भैरहवा — प्रत्येक वर्ष यहाँ सञ्चालन हुँदै आएको शेरबहादुर सेञ्चुरी स्मृति अन्तरविद्यालय टी–२० क्रिकेट शुक्रबारदेखि सुरु हुने भएको छ । आयोजक रुपन्देही क्रिकेट संघले बुधबार पत्रकार सम्मेलन आयोजना गरेर प्रतियोगिताबारे जानकारी गराएको हो । संघका अनुसार शुक्रबारबाट सञ्चालन हुने प्रतियोगिता पुस १ गतेसम्म चल्ने छ । प्रतियोगितामा रुपन्देहीका ३० विद्यालय सहभागी छन् ।

भैरहवास्थित पर्वत ज्वेलर्सका सञ्चालक विमल सेञ्चुरीले आफ्ना हजुरबुबाको स्मृतिमा प्रतियोगिता प्रायोजन गरेका हुन् । भैरहवास्थित सिद्धार्थ क्रिकेट मैदानमा सञ्चालन हुने प्रतियोगितामा जिल्लाका विभिन्न विद्यालयका गरेर ३० वटा समूह सहभागी हुने खेल संयोजक उदयकुमार मल्लिकले बताए । उनकाअनुसार यसपटक ६ वटा विद्यालयको सहभागिता बढेको छ । प्रतियोगितामा कक्षा १० सम्मका खेलाडीहरु सहभागी हुन पाउने छन् ।