काठमाडौँ — दृष्टिविहीन महिला टी–२० क्रिकेट विश्वकपको पहिलो संस्करणमा नेपाल उपविजेता बनेको छ । श्रीलंकाको कोलम्बोमा आइतबार भएको फाइनलमा भारतले नेपाललाई ७ विकेटले पराजित गर्‍यो । यससँगै नेपाल उपविजेतामै रोकिएको हो ।

भारतले टस जितेर नेपाललाई ब्याटिङको निम्तो दिएको थियो । नेपालले अपेक्षाअनुसार प्रदर्शन गर्न सकेन र निर्धारित २० ओभरमा ५ विकेटको क्षतिमा १ सय १४ रन मात्र बनायो । कप्तान विनिता पुन ४ रनमा रनआउट भइन् भने मनकेसी चौधरी ८ रनमा आउट भइन् ।

बी–१ ब्याटर सुष्मा तामाङले २४ बलमा ६ रन बनाइन् । विमला राईले २६ बलमा २६ रन जोडेर सरिता घिमिरेसँग मिलेर ६१ रनको साझेदारी गरेकी थिइन् । नेपालले ९५ रनमा ५ विकेट गुमायो, जहाँ इसारा माया शून्य रनमा आउट भइन् । सरिता घिमिरेले ३७ बलमा ३३ रन र विनिता सोमाईले ९ रनको योगदान दिइन् ।

भारतले ११.४ ओभरमै ३ विकेट गुमाएर १ सय १७ रन बनाउँदै सहज जित दर्ता गर्‍यो । ओपनर ए देवी २ रनमा आउट भइन् भने डी थिमबालाहाटीलाई ७ रनमा सरिता घिमिरेले रनआउट गरिन् । करुणा कुमारीले २७ बलमा ४२ रन जोड्दै भारतलाई जितको आधार बनाइन् । अन्त्यतिर पुला सुरेनले २६ बलमा ४४ रन तथा वसन्ती हास्दाले १२ रन बनाउँदै भारतलाई च्याम्पियन बनाए ।