काठमाडौँ — २९ औं अन्तर्राष्ट्रिय खगोल ओलम्पियाडमा नेपालले कांस्य पदक हात पारेको छ । २०८२ कात्तिक २० देखि २९ (नोभेम्बर ६ देखि १५) सम्म बंगलादेशको राजधानी ढाकामा आयोजित प्रतियोगितामा सेन्ट जेभियर्स स्कुल गोदावरीमा कक्षा १० मा अध्ययनरत सौर्यम श्रेष्ठले नेपालका लागि उक्त पदक दिलाएका हुन् । 

नेपाल एस्ट्रोनोमिकल सोसाइटी सन् २०१८ बाट अन्तर्रास्ट्रिय खगोल ओलम्पियाडमा सहभागी हुँदै आइरहेको छ । नेपालले २०१९, २०२३ साथै २०२५  गरी तीन पटक कांस्य पदक जितिसकेको छ । 

२०१४ बाट सुरु राष्ट्रिय एस्ट्रोनोमी ओलिम्पियाडबाट हरेक वर्ष विद्यार्थीहरुले विभिन्न अन्तर्राष्ट्रिय ओलम्पियाडहरुमा भाग लिँदै आएका छन् । 

राष्ट्रिय एस्ट्रोनोमी ओलिम्पियाड के हो ?

राष्ट्रिय एस्ट्रोनोमी ओलिम्पियाड एक प्रारम्भिक प्रतिभा पहिचान शैक्षिक प्रतियोगिता हो । यस प्रतियोगितामा सामेल भई उत्कृष्ट प्रदर्शन गर्ने विद्यार्थीहरुलाई अन्तर्राष्ट्रिय प्रतियोगिताको लागि सिफारिस गरिँदै आइएको छ । २०१४ बाट संचालन गरिएको प्रतियोगिताबाट तीन हजारभन्दा बढी विद्यार्थीले आफ्नो प्रतिभा परीक्षण गरिसकेका छन् ।