हेटौंडा — कास्कीको लालीगुराँस एसोसिएसन र काठमाडौंको चित्लाङ एफसी एन्फा प्रेसिडेन्ट लिगको फाइनल प्रवेश गरेको छ ।

आइतबार हेटौंडाको गौरीटार रंगशालामा भएको सेमिफाइनल खेलमा जित निकाल्दै दुवै टोली फाइनल प्रवेश गरेका हुन् ।

पहिलो सेमिफाइनल खेलमा लालीगुराँसले सुर्खेतको कार्केविहार युथ क्लबलाई २–० गोलले हरायो । लालीगुराँसका लागि मुकुन्द कुमार निउरले २० औं र राम थापाले ९२ औं मिनेटमा गोल गरे । निउर प्लेयर अफ दि म्याच भए । 

यसैगरी दोस्रो सेमिफाइनलमा चित्लाङले बाराको नवजागृतिलाई सडनडेथमा ९–८ गोलले हरायो । निर्धारित खेल समय गोलरहित बराबरीमा सकिएपछि खेल टाइब्रेकरमा धकेलिएको थियो । टाइब्रेकरमा पनि ४–४ गोलको बराबरीपछि खेलको नतिजा सडनडेथबाट लिएको हो । प्लेयर अफ दि म्याच चित्लाङका गोलरक्षक विशाल केसी घोषित भए । उनले दुई प्रहार रोके ।