पाल्पा — रामपुर आवासीय माविले विद्यालयस्तरमा फुटबल खेलाडी पहिचान गर्न पाल्पाको रामपुरमा आयोजित अन्तर विद्यालयस्तरीय फुटबल प्रतियोगिताको उपाधि जितेको छ ।

रामपुर नगरपालिकाको किसानबारी खेलमैदानमा शनिबार रामपुरले दरैठाँटी मावि रामपुरलाई १–० ले हराएको थियो । रामपुरका खेलाडी चिराजन मल्लले दोस्रो हाफको पाँचौं मिनेटमा गरेको गोल नै निर्णायक बन्यो ।

रामपुरले ३० हजार र दरैठाँटीले २० हजार रुपैयाँ पुरस्कार पाए । अन्तर्राष्ट्रिय विपी चिन्तन प्रतिष्ठानका अध्यक्ष तथा समाजसेवी सन्दीप राना, रामपुर फुटबल एकेडेमीका अध्यक्ष अनिल शाही ठकुरी, रामपुर नगर खेलकुद विकास समितिका अध्यक्ष कमल सेनलगायतले पुरस्कार वितरण गरे । उत्कृष्ट खेलाडी रामपुरका सन्देश राना, उत्कृष्ट गोलकर्ता संगम बिक, उत्कृष्ट डिफेन्डर दरैठाँटीका विशन चौबे, सर्वाधिक गोलकर्ता आनन्द निकेतनका रोनिक बिक चुनिए । प्लेयर अफ द फाइनल रामपुरका चिराजन मल्ल भए ।