काठमाडौँ — किस्क र एलाइट बास्केटबल एकेडेमीले तेस्रो ओएसिस कप उपत्यकाव्यापी अन्तरविद्यालय थ्री बाइ थ्री बास्केटबल प्रतियोगितामको उपाधि जितेका छन् ।

दोहोरो उपाधि जितेको किस्क सिनियर र जुनियर ब्वाइजमा च्याम्पियन बन्यो । एलाइट एसईईतर्फ पहिलो भयो ।

आयोजक ओएसिस स्कुलको कोर्टमा सिनियर ब्वाइज फाइनलमा किस्कले रेडियन्ट पब्लिकलाई १७–१० स्कोरले पराजित गर्‍यो । किस्कका ब्रुक्स जेन्सेनले ८ स्कोर जोडे । जुनियर ब्वाइजको फाइनलमा किस्कले ज्ञानोदयलाई ८–६ ले हरायो । किस्कका जय महर्जनले ७ स्कोर गरे ।

एसईईको उपाधि भिडन्तमा एलाइटले आयोजक ओएसिसलाई १९–१५ ले हरायो । विजेताका प्रदीन बोहराले स्कोर गरे । विजेताले १० हजार र उपविजेताले ५ हजार पाए । एलाइटका प्रदिन ‘मोस्ट भ्यालुएबल प्लेयर’ घोषित भए । ओएसिसका जेसन राना मगर सर्वाधिक स्कोरकर्ता बने । दुवैले जनही ३ हजार पाए ।