काठमाडौँ — पुबुदु दासानायके नेपाल प्रिमियर लिग (एनपीएल) क्रिकेटका लागि विराटनगर किंग्सको प्रशिक्षक बनेका छन् । केही विश्व स्टारलाई अनुबन्धन गरेर चर्चामा रहेको विराटनगर किंग्सले सोमबार सामाजिक सञ्जालमार्फत पुबुदुलाई प्रमुख प्रशिक्षकको जिम्मेवारी दिएको घोषणा गरेको छ ।

पुबुदुको प्रशिक्षणमा गत वर्ष जनकपुर बोल्ट्स पहिलो संस्करणको एनपीएल च्याम्पियन बनेको थियो । दुई कार्यकाल नेपालको प्रशिक्षक रहिसकेका पुबुदु हाल अमेरिकी राष्ट्रिय टोलीको प्रशिक्षक छन् । पुबुदुको प्रशिक्षणमा अमेरिकाले अघिल्लो साता नेपाल र यूएई समावेश विश्वकप लिग २ को शृंखलाका सबै चार खेल जितेर ‘क्लिनस्विप’ गरेको थियो ।

विराटनगरले श्रीलंकाका पूर्व तीव्र गतिका बलर धम्मिका प्रसादलाई पनि परामर्श प्रशिक्षकको रूपमा टोलीमा समावेश गरेको छ । पुबुदु सन् २०२२ मा दोस्रो पटक नेपालको प्रशिक्षक बनेर आउँदा धम्मिका बलिङ प्रशिक्षक थिए । विराटनगरले गत वर्ष आयरल्यान्डका केभिन ओ’ ब्रायनको प्रशिक्षणमा खेलेको थियो ।