झापा — शिवसताक्षीस्थित दूधे रंगशालामा जारी एलभीडी झापा महिला गोल्डकप फुटबल प्रतियोगितामा एपीएफ फुटबल क्लब शनिबार रोमाञ्चक जित निकाल्दै फाइनल पुगेको छ ।

दोस्रो सेमिफाइनलमा एपीएफले विभागीय प्रतिद्वन्द्वी त्रिभुवन आर्मी फुटबल क्लबलाई टाइब्रेकरमा ४–२ ले पराजित गरेको छ । एपीएफले सोमबार हुने फाइनलमा अर्को विभागीय टोली नेपाल पुलिस क्लबविरुद्ध प्रतिस्पर्धा गर्नेछ ।

खेलको सुरुदेखि नै दुवै टोली आक्रमक शैलीमा उत्रिए । आर्मी र एपीएफ दुवैले एकअर्काको पोस्टमा निरन्तर दबाब सिर्जना गरिरहे । २६ औं मिनेटमा एपीएफकी सरु लिम्बूले बक्सबाहिरबाट प्रहार गरेको बल पोस्ट नजिकबाट बाहिरियो । त्यसपछि २९ औं मिनेटमा आर्मीकी तुलसा बोहराको क्रसमा फरवार्ड विमला चौधरीको आकर्षक हेडर पनि पोस्टमाथि गयो ।

एपीएफकी कप्तान अनिता बस्नेतको कर्नरमा रश्मिकुमारी घिसिङको भली प्रहार आर्मीको डिफेन्डर रोक्दा ३९ औं मिनेट बितेको थियो । त्यसको एक मिनेटपछि आर्मीले काउन्टर अट्याक बनायो तर तुलसाको अञ्जना रानामगरसँग वान भर्सेस वान अवसर असफल भयो । दोस्रो हाफमा पनि खेल बराबरीको रफ्तारमा अघि बढ्यो । ५८ औं मिनेटमा रश्मिकुमारीले दुई डिफेन्डर छक्याउँदै प्रहार गरेको बल आर्मीकी गोलकिपर कोपिला खड्काले बचाइन् ।