काठमाडौँ — नेपाल नम्बर वान प्रदीप खड्का र शिभाली गुरुङले मिस्टिक माउन्टेन ग्रान्ड ओपन टेनिस प्रतियोगितामा उपाधि जितेका छन् ।

प्रदीप पुरुष र शिभाली महिला एकलमा च्याम्पियन बने । दुवै प्रतियोगिताको पहिलो च्याम्पियन हुन् । गत वर्षको पहिलो संस्करणमा पुरुष/महिला एकल विधा थिएन ।

सातदोबाटोस्थित टेनिस कोर्टमा शनिबार फाइनलमा प्रदीपले प्रणव मानन्धरलाई ६–३, २–६, ६–२ को सेटले पराजित गर्दै उपाधि जिते । प्रदीपको करियरको यो १७ औं एकल उपाधि हो । डबल्समा उनले नौं उपाधि जितेका छन् । राजवीर प्रधान र निशान श्रेष्ठ तेस्रो भए ।

नेपाल टेनिस संघको सहयोगमा होटल मिस्टिक माउन्टेनद्वारा आयोजित प्रतियोगिताको महिला फाइनलमा शिभालीले स्वस्तिका विष्टलाई ६–०, ६–२ को सोझो सेटमा हराइन् । उनले यू–१६ सिंगल्सको फाइनलमा स्वस्तिकासँग भोगेको हारको बदला लिइन् । सिनियरमा शिभाली समग्र दोस्रो पटक च्याम्पियन भएकी हुन् । प्रकृति श्रेष्ठ र सुनियर थापा तेस्रो भए । पुरुष/महिला एकलमा विजेताले ४० हजार, दोस्रोले २० हजार र तेस्रोले ५–५ हजार रुपैयाँ पुरस्कार पाए ।