झापा — एलभीडी झापा महिला गोल्डकप अन्तर्गत बिहीबार दुधे रंगशालामा सम्पन्न अन्तिम क्वार्टरफाइनल खेलमा त्रिभुवन आर्मी फुटबल क्लबले आरएस पोखरा एफसीलाई ६–० गोलको फराकिलो अन्तरले पराजित गर्दै सेमिफाइनलमा स्थान सुरक्षित गरेको छ।

खेलको सुरुआती चरणदेखि नै बलमा प्रभुत्व जमाएको आर्मीले लगातार आक्रमक खेल्दै खेललाई नियन्त्रणमा राख्यो। १० औँ मिनेटमा फरवार्ड विमला चौधरीले गोल गर्ने अवसर गुमाए पनि १६ औँ मिनेटमा डिफेन्डर विमला विकको फ्रिकिकमा जेनिफर राना मगरले हेडिङ गोल गर्दै टोलीलाई अग्रता दिलाइन्।

उक्त फ्रिकिक उषा शाहीले दीपा राईमाथि गरेको फाउलपछि प्राप्त भएको थियो। ३३ औँ मिनेटमा आर्मीले अग्रता दोब्बर बनायो। पोखराकी गोलकिपरको गल्तीको फाइदा उठाउँदै विमला चौधरीले हेडरमार्फत गोल गरिन्। यसमा हिमा चौधरीले असिस्ट गरेकी थिइन्।

पहिलो हाफको इन्ज्युरी समयमा राष्ट्रिय खेलाडी विमला विकले कर्नर किकबाट आएको बलमा उत्कृष्ट फिनिसिङ गर्दै आर्मीको अग्रता ३–० मा पुर्‍याइन्। दोस्रो हाफमा पनि खेलको गति आर्मीले नियन्त्रणमा राख्यो। ८५ औँ मिनेटमा विमला चौधरीले सञ्जु कुमालको असिस्टमा व्यक्तिगत दोस्रो गोल गर्दै आर्मीलाई ४–० को अवस्थामा पुर्‍याइन्। त्यसपछि ९० औँ मिनेटमा शर्मिला थापाले विमला विकको क्रसमा गोल गर्दै टोलीको अग्रता ५–० बनाइन्।