सुर्खेत — कर्णाली याक्स स्पोर्ट्स प्रालिले सोमबार ट्यालेन्ट हन्ट आयोजना गर्ने भएको छ । नेपाल प्रिमियर लिग (एनपीएल) का लागि कर्णाली याक्सले स्थानीय प्रतिभावान् खेलाडी खोज्न लागेको हो । ट्यालेन्ट हन्ट सोमबार बिहान ७ बजेबाट सुर्खेतको वीरेन्द्रनगरमा रहेको इन्डोर हलमा आयोजना हुने कर्णाली याक्सका कन्सल्ट्यान्ट प्रशिक्षक राजु बस्नेतले जानकारी गराए ।

बस्नेतका अनुसार अघिल्लो दिनसम्म दुई सयभन्दा बढी युवा खेलाडीले ट्यालेन्ट हन्टमा सहभागी हुन निवेदन दिएका छन् । ‘हामीले खुलाएको दर्ता फारममार्फत मात्रै दुई सयभन्दा बढी खेलाडी ट्यालेन्ट हन्टमा सहभागी हुन इच्छुक देखिनुभएको छ,’ प्रशिक्षक बस्नेतले भने, ‘फारम भर्न कोही छुट्नुभएको छ भने पनि हामी उहाँहरूलाई ट्यालेन्ट हन्टमा सहभागी गराउनेछौं ।’