काठमाडौँ — श्रीलंकाका अमेरिकन क्रिकेटर लाहिरु मिलान्थाले जनकपुर बोल्ट्सबाटै दोस्रो सिजनको नेपाल प्रिमियर लिग (एनपीएल) क्रिकेट खेल्ने भएका छन् । ड्रिम स्पोर्ट्स प्रालिको स्वामित्वमा रहेको जनकपुर बोल्ट्सले मिलान्थालाई अनुबन्धित गरेको जनाएको छ ।

गत सिजन जनकपुरलाई पहिलो सिजनको एनपीएलको विजेता बनाउने क्रममा मिलान्थाले सुदूरपश्चिम रोयल्ससँगको फाइनलमा ४९ बलमा ९ चौका र ४ छक्कासहित ८७ रन बनाई जनकपुरलाई ५ विकेटले विजय दिलाउन महत्त्वपूर्ण भूमिका खेलेका थिए । 

फाइनलको उक्त इनिङ्सपछि मिलान्था एनपीएलको उच्च रनकर्ता बनेका थिए । उनले गत वर्ष सर्वाधिक २ सय ९३ रन बनाएका थिए । मिलान्थाले पहिलो सिजनको एनपीएलमा सर्वाधिक ३४ चौका पनि प्रहार गरेका थिए । 

जनकपुर बोल्ट्ससँग मिलान्थाको पुरानै सम्बन्धलाई निरन्तरता दिइएको प्रबन्ध निर्देशक निरोज खतिवडाले जनाए । एक समय श्रीलंका ‘ए’ र श्रीलंकाको इमर्जिङ टोलीबाट खेलेका मिलान्था नेपाली भूमिसँग परिचित छन् । उनले ३ वर्षअघि भएको निकै विवादास्पद नेपाल टी–२० लिगमा लुम्बिनी अल स्टारबाट खेलेका थिए ।