काठमाडौँ — दक्षिण अफ्रिकाले दोस्रो टेस्टमा पाकिस्तानमाथि सानदार विजय हासिल गरेको छ । बिहीबार पाकिस्तानलाई आठ विकेटले पराजित गर्दै दुई टेस्टको सिरिजलाई दक्षिण अफ्रिकाले १–१ को बराबरीमा टुंग्याएको हो ।

जितका लागि दोस्रो इनिङ्समा ६८ रनको लक्ष्य पाएको दक्षिण अफ्रिकाले दुई विकेट गुमाएर ७३ रन बनाएको थियो ।

रावलपिन्डीमा भएको दोस्रो टेस्टको चौथो दिन दक्षिण अफ्रिकाका लागि कप्तान एडेन मार्केलले सर्वाधिक ४२ रन बनाए । यस्तै रायन रिकेल्टनले २५ रन बनाएर नटआउट रहे । 

त्यसअगाडि पाकिस्तान आफ्नो दोस्रो इनिङ्समा १ सय ३८ रन मात्र बनाएर अलआउट भएपछि खेलमाथि उसको पकड गुमेको थियो । पाकिस्तानी पूर्वकप्तान बाबर आजमले ५० रन बनाए पनि अन्य कुनै ब्याट्सम्यानले उनलाई साथ दिएनन् ।