जुम्ला — तिहार र छठ पर्वका अवसरमा जुम्लामा जिल्लास्तरीय फुटबल प्रतियोगिता सुरु भएको छ । चन्दननाथ नगरपालिका–३ को आयोजनामा सुरु भएको प्रतियोगितामा ४४ टिमको सहभागिता रहेको छ ।

जसमा पहिलो दिनको पहिलो खेलमा ढाणथपला युवा क्लब र चन्दननाथ ३ टिमबीच भएको खेलमा चन्दननाथ ३ को टिमले जित्यो । चन्दननाथ ३ ले ढाणथपला युवा क्लबलाई चार गोलले पराजित गर्‍यो ।  

दोस्रो खेलमा गुठिचौर गाउँपालिकाको फोइकालिका एफसी युवा क्लबले जित्यो । जसमा फोइकालिकाले ५ गोल गरेको थियो भने सिद्धगुफाले खाता खोल्न नै सकेन । प्रतियोगिताका संयोजक राजबहादुर खत्रीका अनुसार चन्दननाथ नगरपालिकाका प्रमुख राजुसिंह कठायतले फुटबल प्रतियोगिताको उद्घाटन गरेका थिए ।

पहिलो खेलमा चन्दननाथ ३ का अभिषेक बुढथापा म्यान अफ द म्याच घोषित भए । दोस्रो खेलमा फोइकालिका एफसीका धर्म परियार म्यान आफ द म्याच घोषित भएको संयोजक खत्रीले जानकारी दिए ।

वडाध्यक्ष रतन खत्रीका अनुसार खेलकुदमार्फत युवाबीचको आपसी सम्बन्ध, एकता र उत्सवको भावना मजबुत बनाउन प्रतियोगिता आयोजना गरिएको हो । संयोजक राजबहादुर खत्रीका अनुसार विजेता टिमलाई १ लाख १ हजार रुपैयाँ, उपविजेता टिमलाई ५० हजार ५ सय रुपैयाँसहित मेडल र ट्रफी प्रदान गरिनेछ । प्रतियोगिता कात्तिक १६ गतेसम्म सञ्चालन हुने जनाएको छ ।

उनले पछिल्लो समयमा युवाहरुमा फुटबलको क्रेज बढेको बताए । उनले भने, ‘अहिले फुटबलमा युवाको आकर्षण बढेको छ । जसले फुटबलका राष्ट्रियस्तरको खेलाडी जुम्लामै उत्पादन गर्न सकिने सम्भावना बढ्दो छ ।’

'युवामा फुटबल प्रतिको मोह छ, तर खेल प्रदर्शन गर्ने अवसर हुँदैन,' वडाध्यक्ष खत्रीले भने, ‘यो फुटबल प्रतियोगिता मात्रै नभएर खेलाडीले खेल प्रदर्शन गर्न पाउने अवसरमा रूपमा आयोजना गरिएको हो ।’