पाल्पा — पाल्पाको रामपुरमा आयोजना गरेको प्रथम लालीगुराँस कप राष्ट्रिय यु–१९ फुटबल प्रतियोगिताको उपाधि खस्यौली फुटबल क्लब रुपन्देहीले हात पारेको छ ।  रमपुर नगरपालिका–५, मटेरीस्थित खेलमैदानमा सम्पन्न फाइनल खेलमा रुपन्देहीको खस्यौलीले आयोजक एलजी एसोसिएसन रामपुर पाल्पालाई २–० ले पछि पारेको हो । 

निर्धारित समयको खेल गोलरहित बराबरीमा टुंगिएपछि थप समयमासमेत गोल नभएपछि टाईब्रेकरको सहारा लिनु परेको थियो । टाइब्रेकरमा खस्यौली विजयी भएको हो । 

खस्यौलीले उपाधिसहित नगद २ लाख, ट्रफी, मेडल र प्रमाणपत्र पाएको छ ।  उपविजेता एलजी एसोसिएसन रामपुर पाल्पाले नगद १ लाखसहित ट्रफी, मेडल र प्रमाणपत्र पाएको छ । खस्यौलीका नवीन मसराङ्गी फाइनल खेलको प्लेयर अफ द म्याच बने । मसराङ्गी नै उत्कृष्ट गोलरक्षक समेत भए । 

उत्कृष्ट डिफेन्डर एलजीका अरविन कुमार धामी बने । उत्कृष्ट मिडफिल्डर खस्यौलीका सरोज दर्लामी भए । उत्कृष्ट फरवार्ड एलजीका सन्तोष गोङबा बनेका छन् भने सर्वाधिक गोलकर्ताको पुरस्कार एलजी का सुनिल थापाले हात पारेका छन् ।

प्रतियोगिताको फेयर प्ले टिम देवदह ब्वाइज, रुपन्देही बनेको छ । प्रतियोगिताको सर्वश्रेष्ठ खेलाडी भने आयोजक एलजीकै थापा घोषित भएका छन् । विजेता खेलाडीहरूलाई समापन कार्यक्रमका प्रमुख अतिथि रामपुर नगरपालिकाका नगर प्रमुख रमणबहादुर थापा लगायतले पुरस्कृत गरेका थिए ।