काठमाडौँ — नेपाली महिला क्रिकेट टोलीले मलेसियाविरुद्धको पाँच ट्वान्टी–२० अन्तर्राष्ट्रिय खेलको शृंखला ३–२ ले जितेको छ । नेपालले बुधबार भएको पाँचौं ट्वान्टी–२० अन्तर्राष्ट्रियमा मलेसियालाई ५ विकेटले पराजित गरेसँगै शृंखला कब्जा गरेको हो ।

नेपालले अघिल्लो दिन चौथो खेलमा ६ विकेटको विजय हात पार्दै शृंखला २–२ को बराबरीमा ल्याएको थियो । नेपालले सन् २०२३ मा पनि मलेसिया भ्रमणमा खेलिएको ट्वान्टी–२० अन्तर्राष्ट्रिय खेलको शृंखला ३–२ ले नै जितेको थियो । नेपालले यसअघि सन् २०२२ मा कतारसँगको शृंखला ३–० ले जितेको थियो । 

टस जितेर ब्याटिङ गरेको मलेसियाले निर्धारित २० ओभरमा ७  विकेट गुमाई १ सय ३ रन बनाएको थियो । कप्तान विनिफ्रेड दुराइसिंघमले सर्वाधिक ४० रन बनाइन् । उनले ४६ बल खेल्दै ५ चौका प्रहार गरिन् । माहिराहले १८ बल खेल्दै १ चौकासहित १९ र ऐइना हमिजाह हासिमले १९ बलमा २ चौकासहित १५ रन बनाइन् । 

नेपालबाट कविता कुँवरले ३ विकेट लिइन् । उनले तीनै विकेट अन्तिम ओभरमा लिएकी थिइन् । सोक्रममा उनले कुल ४ ओभरमा १६ रन खर्चिन् । राजमती ऐरीले ३ ओभरमा १५ रन खर्चेर ३ र रचना चौधरीले ३ ओभरमा १६ रन खर्चेर १ विकेट लिइन् । हासिम र दुराइसिंघमले ६ ओभरमा ३८ रन जोड्दै मलेसियालाई उत्कृष्ट सुरुआत दिलाएका थिए । सातौं ओभरमा रचना चौधरीलाई बोल्ड गरी नेपाललाई पहिलो सफलता दिलाइन् ।

त्यसपछि नेपालले कसिलो बलिङ गरेको थियो । राजमतीले १४ औं ओभरमा नुर इजातुल र मास इलिसालाई लगातार बलमा आउट गरेपछि खेल नेपालले नियन्त्रणमा लिएको थियो । प्लेयर अफ द म्याच राजमतीले १६ औं ओभरमा दुराइसिंघमलाई पनि आउट गरेपछि खेलमा नेपाल हाबी भयो । 

नेपालले १८ ओभरमा लक्ष्य पूरा गरेको थियो । उपकप्तान पूजा महतोले सर्वाधिक २४ बलमा १ चौका प्रहार गर्दै २३ रन बनाई आउट भइन् । नेपाललाई विजयनिम्ति २ रन आवश्यक भएको समयमा उनी नुर आल्याको बलमा बोल्ड भइन् । पूर्व कप्तान रुबिना क्षेत्री १५ बलमा १ चौकासहित १५ र कविता जोशी १ रनमा अविजित रहे । 

सम्झना खड्का १० बल खेल्दै १ चौकासहित १३, रुबि पोदार २५ बलमा २ चौकासहित २६, कविता कुँवर १९ बलमा १ चौकासहित १४, इन्दु बर्मा १३ बलमा ८ रन बनाई आउट भए  । मलेसियाबाट आल्या, माहिराह र हासिमले १–१ विकेट लिएका थिए । 

ओमान र यूएई विजयी 

पहिलो दिनका अन्य खेलमा आयोजक ओमान र दाबेदार यूएई विजयी भएका छन् । ओमानले सामोओलाई ५ विकेट र यूएईले कतारलाई ७ विकेटले हराए । न्युजिल्यान्डका पूर्व कप्तान रस टेलर समावेश सामोओले पहिला ब्याटिङ गर्दै निर्धारित २० ओभरमा ९ विकेट गुमाई ९२ रनमात्र बनाउन सक्यो । टेलरले २८ बलमा १ चौकासहित २२ रनमात्र बनाए । फेरेटी सुलुटोले पनि २२ रन बनाए । उनले १६ बलमा २ चौका र १ छक्का प्रहार गरे । ओमानका साह फैजल, मोहम्मद नदिम र हसनाइन साहले २–२ विकेट लिए ।